Tơngai bơh nam 2022 – 2026, càr Dăk Lăk geh 60 kơnòl broă jak chài, măy mŏk kâp càr geh sền swì ai ngui, jàu jăt ngui. Bàr pe cồng nha kơlôi sơnơng neh geh ai tơmŭt tàm mùl màl, pơgồp bơnah bơtàu tơngguh broă lơh sa sươn sre măy mŏk pa, lơh gơlik phan lơh geh bơh sươn sre, phan lơh sơnơm, tam gơl sồ, prăp gàr phan kwơ geh is lời pơrdờn mờ sền gàr pràn kơldang mpồl bơtiàn. Broă lơh tơrlòng lài lơh bal đah Dà lơgar, cau jak chài mờ mpồl lơh sa kă bro kung geh lam lơh sơl tàm bàr pe rơndăp broă lơh jăt ngui bè lơh li la phan bơna sầu riêng, bơtàu tơngguh phan lơh sơnơm, tơrlòng sền swì sơntìl bùm blàng pa mờ ròng tam bơsềt phan lơh sơnơm tềng hơđơm mƀur brê. Bulah bè hơ̆, broă tàm jàu, lơh kă bro phan cồng nha kơlôi sơnơng kung gam ờ hềt pràn jak ngan sơl; broă ătbồ, tơm tơn jơh priă ală kơnòl broă jak chài kung gam uă bơta ờ hềt dipal ngan sơl.

Tàm dơ̆ pơrjum, đơng lam Anih duh broă Làng bol càr Dăk Lăk sồr Sờh Jak chài mờ Măy mŏk pơn jăt tai kờp sền wơl tơngai pơrgon lơh ală kơnòl broă, sền swì mùl màl cồng nha jăt ngui tơnơ̆ sền swì ai ngui; săc rwah ală cồng nha kơlôi sơnơng geh tơl pràn nàng rề ơnàng lơh uă, lơh kă bro phan, pơgồp bal lơh broă kơlôi sơnơng mờ jơnau kờñ bơtàu tơngguh càr dê jăt nùs nhơm Jơnau lơh nền tàm pơrjum sồ 57 Bộ Chính trị dê. Gơ wèt mờ ală gơkòl bè kơrnoăt, sră nggal, càr sồr mhar kờp sền wơl nàng koh tơrmù êt ngan là bơh 50% ală jơnau sồr pal jăt gơ wèt gơnăp gơnoar bơh ƀòn lơgar dê.