Ală jơnau yal bơr bal, geh: Jơnau yal bơr bal lơh jrô ơnàng gĭt gơ̆p Tam klăc lơh broă bal jŏ jòng tơl làm Việt Nam mờ Australia; Jơnau yal bơr bal bè tơngguh uă pràn kong jai, gơdờp mờ bơtàu tơngguh wơl lơh sa Việt Nam mờ Australia; Jơnau yal bơr bal bè sơlơ tàm tơrbŏ jak chài, măy mŏk mờ tam gơl pa bơceh lơh đah Việt Nam mờ Australia. Ală sră nggal lơh broă bal glòm tơl làm tàm uă gah broă, geh ală sră nggal cih kah bè lơh broă bal tàm gah broă lơh sa sươn sre mờ bơtàu tơngguh ƀòn lơh broă sa sươn sre kơnhăp jŏ, lơh jăt kơrnoăt boh lam tàm dà lềng, lơh broă bal mờ dong kờl bal tàm gah sền gàr nhàr lơgar, lơh broă bal bè bơto bơtê broă lơh, gah lơh sơnơm, gah lơh sa sồ mờ lơh broă bal bè jun pơndiang gah rơndeh par.

Dơ̆ lòt còp kâp Dà lơgar tus lơgar Australia bơh ồng Tô Lâm, Tổng Bí thư, Chủ tịch lơgar mờ Mpồl cau ala măt kâp dờng lơgar Việt Nam dê neh pơn jăt tai lơh kơ̆ kơl jăp mờ tơnguh broă pin dờn chính trị tàm kâp dờng ngan, lơh gơlik bơta pràn pa ai broă lam lơh jăt gơtùi tơngume Tam klăc lơh broă bal Jŏ jòng tơl làm, mơkung pơlam gùng ală ai lài lơh broă bal tàm tơngai tus; lơh gơlik tŭ niam nàng đơng lam bàr lơgar in cribơyai jrô ơnàng bè ală broă kơnhoàl ù tiah do mờ ală lơgar sền gròi bal, sơlơ pơgồp bal tai tàm ală pơrjum uă gah, bơh hơ̆ đơs nền jơnau hơ bal gơ wèt mờ ring lơngai, kơ̆ kơl jăp, lơh broă bal mờ bơtàu tơngguh kơnhăp jŏ tàm kơnhoàl ù tiah do mờ tàm dunia.