Dơ̆ lơh Chờ sầu riêng Dăk Lăk nam 2026 geh 17 broă lơh tờm. Tơngume bè: Dơ̆ sơnđờm mut lơh tàm Ƀlàng dờng 10 nhai 3; Anih cribơyai ală bơta sầu riêng kơ̆ kơnhăp; Dơ̆ lơh chờ phan sa wèt tus lơh geh uă ngan rlau jơh Việt Nam mờ 102 phan sa geh trŭ gơm bơh sầu riêng; tiah ràng tơlik mìng dùl gah sầu riêng mờ phan bơna OCOP; ală dơ̆ sền gĭt suơn sầu riêng pơgồp bal mờ lòt nhơl niam chài- ƀòn brê bơnơm; bal mờ uă broă lơh đơs crih tam ya, ràng tơlik mờ gơ hòi gơ jà kă bro phan...

Mùl màl, tiah ràng mìng gah sầu riêng bal mờ phan OCOP geh 310 hìu. Bè lòt nhơl, ală mpồl lơh sa kă bro bơyai lơh 8 broă lơh lòt nhơl sền. broă lòt tàm gùng 500 nơm rơndeh bán tải yal sầu riêng mờ gùng lòt bơh sàh Krông Păc tus sơnah ƀòn Buôn Ma Thuột. Broă lơh đơs crih tamya dờng bal mờ phan sa yal 102 bơta phan sa geh lơh bơh sầu riêng. Pơrlòng ntoăt Tuy Hoà 2026 “Wă măt tơngai sòl àng drim tàm dà lềng” neh hòi jà geh di pơgăp 2 rơbô 600 nă cau dan cih măt tus pơrlòng…

Dơ̆ lơh chờ Phan sa Sầu riêng càr Dăk Lăk geh bơyai lơh tàm suơn bal Rơndăp broă lơh Eco Palace, sơnah ƀòn Buôn Ma Thuột. Tàm do gam yal tơngĭt phan lơh geh bơh broă lơh sa suơn sre, phan bơkah pơn rơ ală tiah dê, phan bơna lòt nhơl, niam chài Tây Nguyên, ƀòn lơh broă ờs mờng mờ ală phan sa, phan hùc geh lơh bơh sầu riêng. Bơdìh mờ broă lơh phan sa, dơ̆ lơh chờ geh ală broă lơh ràng tơlik dròng cing jañ mồng, tàm bơnĕ bơnài bal đờng gòng Tây Nguyên, tam ya xoang, broă nhơl bơh yau, wăc sềr rùp ký hoạ gùng drà mờ ală broă lơh đơs crih tam ya... Năc lòt nhơl kung geh sền gĭt phan hùc ờ sa priă geh lơh bơh sầu riêng, tàm hơ̆ geh kơphê sầu riêng mờ trà sữa sầu riêng.

Ồng Lê Hoàng Cơ, Kwang Lam bồ Dam San Tourist, Kwang Lam bồ Mpồl bơyai Lơh chờ Phan sa Sầu riêng pà git, ală cau chài trŭ sa bơh 20 mpồl pơrlòng tus bơh gùt lơgar rơ̆p tus bal lơh phan sa mờ trŭ gơm “102 bơta phan sa pơgồp bal mờ Sầu riêng càr Dăk Lăk” dê. Broă lơh do lơh geh khà dờng ngan lơgar Việt Nam dê.

 “Sầu riêng là dùl bơta phan geh lơh bơh broă lơh sa suơn sre tơmàn Dolar Mỹ, den tàng añ pal tơnguh bơta dờng bơh broă lơh do dê, bơdìh mờ ngui phan geh is den he pal lơh. Tŭ lơh gơs khà dờng ngan 102 bơta phan sa mờ sầu riêng hơ̆ den bơta lời wơl dŭt ndơl là he pờ geh ală hìu sa, mpồl hìu sa bơh phan sa sầu riêng dê tàm ală tiah, geh tŭ tàm lơgar mờ ală lơgar”.

Dùl broă lơh kờp dŭ geh Guinness dunia dờp lơh geh uă ngan rlau jơh là dơ̆ lòt pơdar mpồl rơndeh dờng pơndiang sầu riêng bơh Krông Pắc tus Anih tờm Sơnĕ 6 mờ bàr pe gơl gùng drà bơh tiah drà Buôn Ma Thuột dê. Mpồl rơndeh dờng pơndiang sầu tiêng lòt pơdar tàm Dơ̆ lơh chờ sầu riêng Dăk Lăk nam 2026 geh 500 nơm rơndeh, tơl nơm rơndeh pơndiang 200 kĭ sầu riêng. Mpồl rơndeh lòt bơh Ƀlàng dờng Tân An, sàh Krông Pắc, ntrờn jat Gùng dờng dà lơgar 26, tơnơ̆ hơ̆ mut tàm Gùng dờng dà lơgar 27  tus Gùng dờng Võ Nguyên Giáp. Mpồl rơndeh pơn jat tai lòt gan tiah Anih tờm Sơnĕ 6 mờ bàr pe gơl gùng drà tàm ù tiah Buôn Ma Thuột dê.

Mò Trần Vũ Thùy Linh, Phó Kwang Lam bồ Mpồl bơyai lơh ai rơndeh lòt tàm gùng pà git, tus tŭ do, Mpồl bơyai lơh neh dờp geh rơlao 600 nă cau geh rơndeh, sơrlèt mờ khà geh ai rơlao 100 nơm. Mpồl ai khà Guinness kung neh ai cau ala măt tus càr Dăk Lăk nàng pơgồp bal, bơyai lơh ală sră nggal nàng dờp khà dờng geh lơh.

“Đah ai khà Guinness sồr pal nền nòn ngan, bơh khà sầu riêng tàm rơndeh pal là plai sầu riêng ngan 100% tus mờ broă cau tus bal pal geh tơl măt sơnđan, sơnam mờ khà măt ală cau măi rơndeh. Mpồl Sầu riềng càr Dăk Lăk neh lơh tơl ală sră nggal do. Bơdìh hơ̆ tai, Mpồl kung neh jà dùl nă cau jăk gơwèt Guinness dê tus tơn càr Dăk Lăk nàng sền. Tơnơ̆ mờ broă lơh do tàm 30 phút, ală cau do sền wơl dùl dơ̆ tai. Di lah ờ geh bơta lơi, khà dờng ngan hơ̆ sồng geh dờp tơn”.

Jăt Mpồl bơyai lơh yal, Lơh chờ Sầu riêng càr Dăk lăk nam 2026 ờ mìng yal khà măt sầu riêng mờ gam wèt tus bơ̆t bơtàu bơta niam gah phan do dê, lơh pràn broă pơgồp bal lơh, tăc, hòi jà bơcri priă tàm gah lơh gơs nền nòn, logistics mờ bơtàu tơnguh lòt nhơl lơh sa suơn sre. Càr Dăk lăk gam rơhời ai Lơh chờ Sầu riêng gơs broă lơh dờng kấp dà lơgar, wèt tus ală lơgar.

Ồng Trần Hồng Tiến, Kwang lam bồ Sờh Niam chài, Tàp pràn să jan mờ Lòt nhơl càr Dăk Lăk pà gĭt, ală dơ̆ sền gĭt suơn sầu riêng geh lơh ờ mìng drơng dơ̆ lơh chờ lơm mờ rơ̆p geh kơlôi sơnơng nàng gơ gơs phan bơna lòt nhơl sùm, pơgồp bơnah ai kàl sầu riêng gơ gơs tiah pơrgon lòt nhơl pah nam bơh càr Dăk Lăk dê.

 “Ală dơ̆ lòt nhơl do ờ mìng là drơng tàm dơ̆ lơh chờ lơm mờ tơnơ̆ do rơ̆p geh kơlôi sơnơng, sền sơwì wơl gơ gơs ală dơ̆ lòt nhơl sùm pah nam. Digơlan là geh ală nam ờ bơyai lơh dơ̆ lơh chờ, mơya mờ nàng tơl nă cau in tus mờ càr Dăk Lăk gơtùi geh sền gĭt tus mờ ală tơngai tam, geh sa, sền broă lơh tam sầu riêng, lơh gơlik, tơnhào, klơm tàm kơldung. Tơnơ̆ dơ̆ lơh chờ bol añ kơ̆p kờñ là pah kàl sầu riêng là tơl nă cau rơ̆p kah tus mờ rơ̆p lòt nhơl tus mờ càr Dăk Lăk”.

Bè cồng nha ngan ngồn bơh Dơ̆ lơh chờ Sầu riêng Dăk Lăk nam 2026 dê gơwèt mờ cau lơh broă sa, ngan là bơta pràn pờ ơnàng drà tăc bro phan, gơ hòi gơ jà bơcri priă, hòi jà kă bro phan mờ ală broă jàu sền sơ wì tŭ dơ̆ lơh chờ tơn jơh, mò Đặng Thị Thủy, Phó Kwang lam bồ Sờh Broă lơh sa suơn sre mờ Tiah ơm kis càr Dăk Lăk pà gĭt:

 “Sờh geh ală gùng dà pơlam ngan ngồn nàng tă pơgồp jơnau đơs ai Anih duh broă Làng bol càr in ală broă lơh tơl làm bơh ală gah tàm atbồ ală plai sầu riêng. Bol añ gam tă pơgồp jơnau đơs mờ Anih duh broă làng bol càr ai lơh jat broă rơndăp lơh lơh pràn tam gơl sồ, tàm hơ̆ geh broă lơh dờng 30 ngai màng. Dơ̆ bàr là lơh jat broă lơh sền gròi tơnơ̆, tŭ do den gơwèt mờ broă lơh pà mã sồ tiah tam mờ anih ơn dăp klơm tàm kơldung den bol añ kung lơh pràn, lơh bè lơi nàng pleh gơtìp blăc pơrlồm tàm mã sồ tiah tam”.

Càr Dăk Lăk tŭ do geh mờr 45 rơbô lồ sầu tiêng, geh rlau 1 bơnah 5 bă ù tam sầu tiêng gùt lơgar dê. Nam 2025, khà sầu riêng lơh geh bơh càr dê geh 390 rơbô tấn, bơta kwơ tăc mờ lơgar ndai lơh geh pơgăp 1 tơmàn 100 tơlak dolar Mỹ, ai sầu riêng gơ gơs dùl tàm ală gah phan broă lơh sa suơn sre tờm bơh càr dê. Bơh nggkời ală khà hơ̆ là broă lơh sa bơh gĭt nđờ jơ̆t rơbô hìu bơnhă làng bol dê, là bơta tam gơl bơh uă ƀòn lơgar mờ bơta pràn nàng sền gàr, lơh jat niam ală bơta kwơ niam chài.

Lơh chờ Sầu riêng càr Dăk Lăk nam 2026 ờ mìng jờng rơ bơta plai chi do, mờ gam ai tơngŏ nùs nhơm kơ̆p kờñ bơ̆t bơtàu khà măt kă bro phan geh lơh bơh broă lơh sa suơn sre pơgồp bal mờ bơta niam chài Tây Nguyên dê, bơtàu tơnguh lòt nhơl mờ tơnguh uă bơta kwơ gơguh bơh gah phan tơmàn Dolar Mỹ dê. Tŭ ală săp dròng cing mpong săp tàm kàl tơnhào sầu riêng dum, hơ̆ kung là tŭ càr Dăk Lăk yal mờ ală bơyô tàm lơgar bal mờ ală lơgar jơnau bè dùl bă tiah git lơh bơta kwơ bơh broă lơh sa suơn sre dê gơs bơta pràn bơtàu tơnguh lơh sa mpồl bơtiàn.