Tàm tiah lơh broă Tiah lơh sa mờ măi mok Hòa Tâm mờ Anih ơhò ơm Bãi Gốc, nùs nhơm lơh broă gam geh lơh gơ jal ngan. Gĭt nđờ jơ̆t nơm rơndeh dờng, rơndeh chŏ ù bal mờ uă phan bơna măi mok lơh cò pơnring sùm mat ù, pờ gùng drơng broă lơh rơndăp broă lơh. Ală bơta lơh broă do geh bơh cồng nha niam tàm broă lơh ai mat ù. Jat Mpồl Atbồ Tiah lơh sa  Phú Yên, tơnơ̆ broă lơh dờng geh lơh uă, rơndăp broă lơh Tiah lơh sa mờ măi mok Hoà Tâm neh lơh sir ai ơpah rlau 215 lồ ù. Tàm bơnah bă ù gam wơl, gĭt nđờ jơ̆t lồ mat ù niam neh pơn jat tai geh tàm jàu ai cau bơcri priă in. Mìng is Anih ơhò ơm Bãi Gốc, jơh 64,9 lồ ù gờl neh geh jàu, lơh geh ală bơta nàng rơndăp broă lơh in sơnđờm mut lơh ală bơnah phan tờm tàm nhai 9 tus do.

Ồng Đỗ Văn Khánh, Phó Lam bồ Kông ty Cổ phần bơcri priă mờ bơtàu tơnguh phan bơna bơt bơtàu Tiah lơh sa mờ măi mok Hòa Tâm đơs nền: "Chủ tịch kung bè đơng lam bồ Anih lơh broă Làng bol càr kung neh tơnggơs mpồl lơh broă mhar lời is ai broă lơh ai mat ù bè pa do kung neh kràñ cê jơh nùs ngan. Đơng lam bồ Hoà Phát kung hơ bồ nhai 9 rơ̆p lam lơh, gàr niam tơl ală bơta bè adat boh lam mờ tiah lơh geh cau dờp lơh broă nàng lam lơh jat”.

Ờ mìng tàm Hòa Tâm lơm, broă lơh dờng ai mat ù kung gam lơh geh bơta tàm ntrờn tàm uă rơndăp broă lơh tờm ndai. Tàm bơta mut lơh Tơnau dà Buôn Biếp, gơwèt rơndăp broă lơh Tơnau dơng dà Yên Ngựa, sàh Liên Sơn Lắk, ală mpồl lơh broă gam jat nền ù tiah, pơgồp bal kờp sền, lơh sir sră nggal tơm priă. Tus tŭ do, rlau 8,34 lồ bơh 31 hìu bơnhă làng bol neh geh ring bal gùng dà broă lơh tơm priă mờ priă tă tơm rlau 10 tơmàn 600 tơlak đong; dơ̆ 2 kung neh lơh sir broă kờp sền, pơnđơl pràn lơh ngan lơh sir broă ai ù tàm nhai 8 nàng tàm jàu mat ù mut lơh broă in. Ồng Nguyễn Anh Tú, Chủ tịch Anih duh broă Làng bol sàhLiên Sơn Lắk pà gĭt: "Tŭ do neh tơnggơs ală mpồl mblàng yal jơnau rau, lik lòt lơh broă mờ làng bol tơn. Kwang bàng Cơldŭ lơh broă lơh sa pơgồp bal mờ Anih tờm Ù tiah bơh Mpồl Ea Kar dê kờp sền mờ lơh broă tơn”.

Bulah uă rơndăp broă lơh neh geh tam gơl niam, ai mat ù kung là bơta gơ kòl dờng ngan rlau jơh bơh bơcri priă dà lơgar dê. Jat Mpồl Atbồ Rơndăp broă lơh bơcri priă lơh bơt bơtàu broă lơh Gùng lòt rê mờ Broă lơh sa suơn sre bơtàu tơnguh ƀòn lơgar càr Dăk Lăk, mpồl lơh broă gam atbồ 35 rơndăp broă lơh, tàm hơ̆ geh 17 rơndăp broă lơh gam gơkòl mat ù mờ tam gơl niam rơndăp broă lơh. Mìng is broă lơh tờm priă gam gơ kòl tàm 19 sàh, gơrềng tơn tus tŭ tơngai mut lơh mờ ai priă. Ồng Trần Tiến Đông, Lam bồ Mpồl Atbồ Rơndăp broă lơh bơcri priă lơh broă lơh bơt bơtàu Gùng lòt rê mờ Broă lơh sa suơn sre bơtàu tơnguh ƀòn lơgar càr Dăk Lăk pà gĭt: "Ală rơndăp broă lơh gam gơ kòl mờ ờ hềt ai priă gơ lơh bè là tàm broă lơh ai mat ù. Gam ală rơndăp broă lơh neh geh mat ù den Mpồl gam đơng lam ală cau dờp lơh broă jơh nùs lam mut lơh, gơ jal ngan mờ trồ tơngai niam nàng mut lơh jơh ngai mang, lơh mhar tŭ tơngai lơh sir”.

Tus ngai 10/7/2026, càr Dăk Lăk neh ai 2 rơbô 921 tơmàn đong, lơh geh rlau 30% broă rơndăp lơh geh ai. Nàng lơh sir jơnau kờñ gơguh tai 2 nơm khà, Anih duh broă Làng bol càr sồr ală sờh, gah, ală tiah tơrgùm tă bơsong ală bơta kòl yan bè rơndăp ù tiah, ù tiah, sră nggal bơcri priă lơh, tiah ơm mờ phan bơna bơt bơtàu; kờp sền, bơsong tơn jơh 396 rơndăp broă lơh, broă lơh bơt bơtàu lơyài tŭ tơngai mut lơh; pơn jat tai lơh jat niam broă lơh “gùng tơlir”, pơgồp bal mờ kơnòl broă ai priă mờ Broă lơh dờng 45 ngai mang ai mat ù mờ lơh jat niam gơnoar bơh 5 mpồl lơh broă tàm tă bơsong kal ke jat tơl rơndăp broă lơh, tơl ù tiah dê. Jơnau kờñ geh ai tơlik là tus jơh qúy 3 ai priă bơcri uă ngan rlau jơh 67% broă rơndăp lơh priă bơcri, tus jơh qúy 4 lơh geh 92% mờ lơh sir 100% lài mờ ngai 31/1/2027. Ồng Đỗ Hữu Huy, Chủ tịch Anih duh broă Làng bol càr Dăk Lăk đơs sùm:  "Kờp sền jơh ală broă rơndăp lơh 6 nhai lồi nam, sền gĭt loh tơl kơnòl broă tờm bơh nhai 7, nhai 8 mờ qúy 3; tơrgùm bơsong tơn jơh ală bơta gơ kòl gam kơryan gơguh tai mờ bơtàu tơnguh. Tơl nă kwang bàng đơng lam pal lòt tơn tàm ƀòn lơgar, lòt sền tơn tiah lơh broă, lơh broă tơn mờ mpồl lơh sa kă bro, mờ cau bơcri priă lơh, mờ làng bol nàng tă bơsong kal ke; nùs nhơm là jàu broă pal jat tus gùng tus dà, pơrgon là pal lơh, neh lơh là pal geh cồng nha”.

Bơh ală dơ̆ mut lơh broă tàm ală tiah lơh broă tus bơta kràñ cê jơh nùs tàm đơng lam, sồr lơh, càr Dăk Lăk gam hời rơ hời bơsong bơta gơ kòl ai mat ù, lơh mhar ai priă bơcri dà lơgar. Tŭ ală rơndăp broă lơh tờm geh tơnguh mhar mờ mpồl priă geh tơmŭt mhar tàm broă lơh sa, do rơ̆p là bơta gơn kơnờm kwơ màng nàng càr in lơh jat ngan ngồn jơnau kờñ gơguh tai 2 nơm khà tàm nam 2026.