Jăt jơnau kờp tus ngai òr (06/05), kờp jơh mpồl lơh bơh 7 rơndăp broă lơh hìu bơsram ơm sa bic tơn bàr kấp tàm tiah nhàr lơgar đah măt tơngai Mŭt càr Gia Lai mìng rơ̆p geh di pơgăp 40% broă geh ai lơh; tàm hơ̆ 6 broă lơh ờ di mờ tơngai neh geh ai.

Bŭ lah ală cau bơcri priă neh tơnguh priă lơh uă rơlao mờ priă geh ai bal, mơya kung gam ờ tơl cau lơh broă. Nàng lơh gơs ală broă lơh do lài mờ nhai 7 nam 2026, di drơng nam bơsram pa in, Mpồl Atbồ Rơndăp broă Bơcri priă bơ̆t bơtàu càr Gia Lai kờp dŭ pal bơtơl di pơgăp 500 nă cau lơh broă. Kờp dŭ tàm nhai 5 do, mpồl ling klàng tàm càr do rơ̆p tus dong kờl ală gah lơh broă dong kờl, ờ kờñ geh bơta chài uă nàng tơrmù bơta ờ tơl cau lơh broă ai ală mpồl lơh hìu bơsram in.