. Đơs tàm pơrjum, Củ tịc Quôk hội ồng Trần Thanh Mẫn đơs là, sền wơl tơngai lơh broă Quôk hội khoă XV là dùl tơngai lơh broă bềng kal ke, bơta lòng tềng đap bơta gơlik geh bơh kòp Kovid-19, dunia geh uă tam gơl, tàm lơgar gơlik geh càl rbut dờng dà tih dà lìu, lam lơh broă lơh tơrmù dipal mpồl lơh broă sră pơ àr gơnoar atbồ.

Tàm bơta bè hơ̆, Quôk hội neh kơ̆ dơn lam lơh gùng dà, jơnau lơh nền, broă lơh bơh Đảng, adat boh lam bơh Dà lơgar dê mờ khà broă uă ngan. Geh ală tŭ, Quôk hội neh pal lơh ngai, lơh mang, lơh bal mờ ngai lồi poh, ngai rlô drơng broă tơrmù dipal mpồl lơh broă sră pơ àr gơnoar atbồ, rơndap lơh, cồng nha lơh geh… Củ tịc Quôk hội ồng Trần Thanh Mẫn jờng rơ ală cồng nha neh lơh geh tàm nam 2025 đơs is mờ jơh gùt tơngai lơh broă Quôk hội khoă XV. Lam lơh srơh tàm pơrlòng tàm tơngai tus, Củ tịc Quôk hội ồng Trần Thanh Mẫn đơs là, tơngai lơh broă Quôk hội khoă XVI kơn jơ̆ ngan, pal pơn jat tai tam gơl pa bồ tơngoh kơlôi sơnơng bơt bơtàu adat boh lam, lam lơh gơtùi ală jơnau lơh nền, ală jơnau đơs pơn dut bơh Ƀộ Cíñ trị, Mpồl đơng lam Đảng dê nàng lơh sa – mpồl bơtiàn bơtàu tơnguh, gàr niam lơngăp lơngai dà lơgar, bơt bơtàu ală anih lơh broă cíñ trị. Jơnau kờñ dut ndơl là tơnguh bơta niam rài kis phan bơna mờ nùs nhơm làng bol dê.