Pơn rơ ngan bơh bơta ờ tơl ù bơt là rơndap broă lơh gơl gùng kềng gah dà lềng Vạn Ninh – Ninh Hòa jòng mờr 25 kơi sồ, kờp jơh priă bơcri lơh rlau 2 rbô tơmàn đong. Rơndap broă lơh do kờñ geh mờr 1 tơlak 300 rbô khối ù bơt, mơya tài ờ tơl ù den tàng tơngai hơ pơrgon lam lơh mìng rơp pa geh mờr 30%. Ồng Trần Minh Chiến, Cau lam bồ mpồl atbồ tiah lơh sa mờ ală Tiah lơh sa mờ măi mok càr Khánh Hòa kơlôi rơcang: “Gùng kềng gah dà lềng tŭ do lam lơh kal ke ngan tài ờ tơl ù nàng lơh. Ờ tơl ù lơh den rơp lơh gơ rềng tus ai priă bơcri dà lơgar. Mờr tus, ală tiah lơh sa mờ măi mok lam lơh bơt bơtàu phan bơna kung gơ kòl sơl. Bơh tŭ do, cau bơcri priă kơlôi rơcang ngan tài ờ geh tơl ù nàng lơh, tŭ tàm pơn ring tờ ù, bồr ù gam ờ tơl uă ngan ù nàng lơh”.

Jat Sờh Broă lơh sa suơn sre mờ Tiah ơm kis càr Khánh Hòa, ală rơndap broă lơh tàm càr Khánh Hòa gam kờñ geh mờr 6 tơlak 300 rbô khối phan bơt bơtàu bồr tơnring mờ 350 rbô khối lŭ bơt bơtàu. Nàng bơsong bơta ờ tơl phan, ală cau tờm bơcri priă lơh gam ai ù, lŭ jơngkah tŭ lam lơh ală rơndap broă lơh gùng lòt ndai. Tŭ do, kờp jơh khà phan bơt bơtàu jơngkah tàm ală ƀlàng sang mờr 3 tơlak 300 rbô khối. Ồng Phạm Văn Hòa, Phó Kwang lam bồ Mpồl atbồ ală rơndap broă lơh Broă lơh sa suơn sre mờ Gùng lòt càr Khánh Hòa pà git, broă jun ntrờn là pal geh ngan: “Broă do rơp geh uă bơta kuơ nàng gơtùi rơcang lài phan bơt bơtàu bơh rơndap broă lơh dê, tơrmù bơta tuh sang phan. Tài bè tàm rơndap broă lơh gùng rơndeh lòt mhar Khánh Hòa – Buôn Ma Thuột kung kal ke ngan sơl tài ờ geh tiah nàng tuh. Jun ntrờn nàng ngui ai rơndap broă lơh ndai in rơp dong tơrmù uă ngan priă bơcri ai jơh bal 2 rơndap broă lơh in”.

Bơta ờ tơl phan bơt bơtàu tàm càr Khánh Hòa sơn đờm bơh jơnau kờñ gơguh uă tàm tŭ mpồl tac phan bơt bơtàu tàm càr den ờ huan geh, sră pơ àr ai gơnoar tơnhàu phan tàm ù mờ tơnguh bơta pràn tơnhàu phan tàm ù kung gam roh uă ngan tŭ tơngai. Nàng bơsong bơh nggu tờm bơta do, bơdìh mờ broă jun ntrờn phan bơt bơtàu, càr Khánh Hòa gam sền nền wơl ală tiah geh tơl bơta nàng tờ tơnhàu, yal broă rơndap lơh atbồ phan kuơ tàm ù tơmut tàm Rơndap ù tiah càr dê. Bal mờ hơ̆, sền swì ring bal bàr pe tiah ờ pơrlòng giă priă gơnoar tờ tơnhàu phan tàm ù nàng kờñ tac phan bơt bơtàu ai ală broă lơh, rơndap broă lơh kuơmàng in. Ồng Lê Huyền – Phó Củ tịc Anih duh broă Làng bol càr Khánh Hòa sồr ală cau tờm bơcri priă, mpồl pơlam pal rơcang bơh bơnah broă rơcang rơndap broă lơh, sền swì nền mpồl tac phan bơt bơtàu nàng bơt bơtàu broă rơndap lơh dipal, pleh gơlik geh bơta gơ kòl tàm tŭ lam lơh: “Ală mpồl atbồ rơndap broă lơh kờñ pal rơcang lài bơsong bơta: rơndap broă lơh he dê kờñ geh phan bơt bơtàu lơi? Tềng lơi? Giă kàr lơi? Pleh bơta phan bơt bơtàu lơi den gơtùi đơs, mơya lùp tềng lơi mờ giă kàr lơi den ờ gơtùi hơ. Dilah ờ gơtùi đơs tềng lơi den ờ git là geh bơnàng jă lơi nàng bơt bơtàu jơnau kờp dŭ nàng ngui tàm broă lơh, tài ơm yah ngài 3 kơi sồ halà 5 kơi sồ den rơp krơi ngan. Lơh gơbàn bơta rơmơp ndơl ai gah broă lơh sa suơn sre mờ tiah ơm kis in tàm tŭ jòi anih, geh jơnau dan, tơmut tàm rơndap ù tiah”.