Tàm dơ̆ tìp, bàr gah đơs niam broă lơh bal sền gàr lơngăp lơngai ngai sơlơ geh gơnoar kwơ màng tàm bơta git gơ̆p đah bàr lơgar dê mờ đơs nền broă lơh nền nòn rơlao tai pơgồp bal đah ală anih lơh broă sền gàr lơngăp lơngai, lơh jăt adăt boh lam mờ ai geh gùng dà broă lơh.

Tàm tơngu me git gơ̆p Tam klăc bal Kwơ màng Tơl ală bơta đah lơgar Việt Nam mờ Ấn Độ, Tổng Ƀí thư, Củ tịc lơgar ồng Tô Lâm mờ Kwang dong broă Sền gàr lơngăp lơngai Dà lơgar Ấn Độ ồng Ajit Doval đơs nền tus mờ broă pal pơgồp bal geh cồng nha tàm broă tam dră mờ cau sò tơm iơh bơsăk, cau tìs gan dà lơgar, pơrlồm tàm internet mờ ală bơta pơhìn pa gơlik geh, bơh tŭ hơ̆ pơgồp bal tàm broă gàr niam lơngăp lơngai dà lơgar mờ mpồl bơtiàn bơh tơl lơgar dê. Bàr gah kung ring bal lơh pràn broă pơgồp bal đah sền gàr lơngăp lơngai mờ bơtàu tơnguh, rề ơnàng broă lơh bal tàm ală gah broă măi mok kwơ màng bè ngăc ngar kòn bơnus lơh gơs, tam gơl sồ, tam gơl bơceh lơh, năng lượng mờ bơto cau lơh broă geh bơta jăk uă. Bè ală bơta tàm tiah do mờ ală lơgar, bàr gah ring bal bè broă lơh geh sùm ling rơngai, kơ̆ kơl jăp, lơngăp lơngai mờ khăt gơboh gùng lòt tàm dà lềng, tàm kơl wàng trồ; bơsong tam phà mờ gùng dà broă lơh ring lơngai tàm tơngui me adăt boh lam ală lơgar dê, tàm hơ̆ uă ngan là Kơrnoăt hơ bal Liên hợp quốk bè Adăt Dà lềng nam 1982 (UNCLOS 1982).

Tàm dơ̆ tus còp kấp Dà lơgar tàm lơgar Ấn Độ, mang òr (05/05), Tổng Ƀí thư, Củ tịc lơgar ồng Tô Lâm neh tus còp mờ đơng lam dơ̆ tìp măt kwang bàng cau lơh broă tàm Anih ala măt bal mờ gal làng bol cau lơgar Việt Nam tàm lơgar Ấn Độ.