Tơnơ̆ mờ tŭ iăt jơnau đơs bơh ala măt ală ƀộ, gah lơh broă dà lơgar, ala măt kwang đơng lam Anih cah rơña Làng bol Dờng rơlao jơh, Củ tịc lơgar ồng Lương Cường đơs là, bơh bồ tơngai lơh broă Pơrjum dờng dơ̆ XIII bơh Đảng dê tus tŭ do, bơdìh mờ uă jơnau ƀuơn bơh gah Cah rơña dê kung tìp uă bơta kal ke, mơya gùt gah lơh broă do neh git nền cê gơnoar, kơnòl, tam klăc bal lơh ngan lơh gơs niam ală kơnòl broă, gơnoar broă geh jào di jăt mờ jơnau neh geh ai.

Củ tịc lơgar kung đơs loh ală broă lơh gam ờ pràn mờ sồr gah Cah rơña bơsong nàng lơh jăk niam kơnòl, pơgồp bal tàm broă lơh geh cồng nha ală jơnau kờñ, kơnòl broă tàm tơngai tus. Củ tịc lơgar pin dờn mờ nùs nhơm tam klăc bal, lơh ngan dùl nùs bal, gah Cah rơña rơ̆p sơrlèt mờ bơta kal ke, bơta lòng mờ lơh gơs niam kơnòl, gơnoar broă bơh anih cah rơña dê, bơtàu tơnguh tơl ală bơta mờ pràn kơl dang rơlao tàm tơngai tus.