Củ tịc Quốk hội ồng Trần Thanh Mẫn đơs nền, lơgar Việt Nam sùm jờng rơ, ai tơl bơta ƀuơn ală cau bơcri priă lơgar bơdìh tàm lơgar Việt Nam tàm hơ̆ geh Aeon Mall; kờñ broă lơh jŏ jòng kă bro bơh kông ty Aeon Mall tàm lơgar Việt Nam; mờ pà git geh uă càr, ƀòn dờng ndai tàm lơgar Việt Nam, tàm hơ̆ geh càr Bắc Ninh kung rơcang lơh broă bal mờ Aeon Mall pờ anih kă bro phan Aeon Mall.

Ồng Ohno Keiji pà git, Aeon Mall pờ anih kă bro phan sơnrờp ngan tàm nam 2014 tàm ƀòn dờng Hồ Chí Minh, nhai 9 lài do neh ai ngui anih kă bro Aeon Mall tàm ƀòn dờng Huế geh broă lơh dờng ngan tiah tàm gùl lơgar dê. Di tàm dơ̆ do Aeon Mall kĭ lơh broă bal mờ ƀòn dờng Cần Thơ, kơ̆p kờñ pơn jăt tai ai tơl bơta ƀuơn nàng rề ơnàng lơh broă bơcri priă tàm ală càr, ƀòn dờng ndai tàm lơgar Việt Nam.