Tàm dơ̆ lòt còp mờ lơh broă tàm càr Hà Tĩnh, mho ngai 27/12, Củ tịc Quôk hội ồng Trần Thanh Mẫn neh lơh broă mờ Mpồl Lơh kơnòl broă sùm Tỉñ ủy càr Hà Tĩnh bè cồng nha lơh jat Jơnau lơh nền tàm Pơrjum dờng Đảng gùt lơgar dơ̆ XIII, Jơnau lơh nền tàm Pơrjum dờng Đảng ƀộ càr dơ̆ XIX, tơngai lơh broă bơh nam 2020-2025 mờ lam lơh Jơnau lơh nền tàm pơrjum bơh Anih Lơh kơnòl broă sùm Quôk hội dê bè broă rơndăp tăp sèng mpồl lơh broă sră nggal gơnoar atbồ kấp kơnhoàl, kấp xã bơh càr dê tơngai bơh nam 2023 - 2025. 

Tơnơ̆ tŭ iăt kwang đơng lam bồ càr Hà Tĩnh yal, ală kwang bàng tàm Mpồl lơh broă neh tơngŏ bơta niam ngan mờ gơguh kờp jơh phan bơna lơh geh tàm ù tiah (GRDP) càr Hà Tĩnh dê lơh geh 7,48%, priă lơh geh tàm dơlam is lơh geh 9 rơbô 600 tơmàn đong tàm kờp jơh lùp dồs priă dia jơh gùt nam là 18 rơbô tơmàn đong. Hà Tĩnh là tiah niam ngan lòt lài jơh gùt lơgar tàm broă bơt bơtàu ƀòn lơgar pa. Ală kwang bàng tàm Mpồl lơh broă kung kơ̆p kờñ Hà Tĩnh pơn jat tai tă bơsong ală bơta gơ kòl nàng bơtàu tơnguh pràn uă rlau tai, lơh ngan gơguh lơh sa lơh geh khà 2 nơm sồ. Củ tịc Quôk hội ồng Trần Thanh Mẫn đơs là, mờ ală bơta ƀuơn, bơta pràn bơh Hà Tĩnh dê, dilah geh bơsong rơ̆p bơtàu tơnguh uă rlau tai, ờ ơm wơl tàm cồng nha bè tŭ do. Di dơ̆ nam pa Ất Tỵ, tàm mho ngai 27/12, tàm kơnhoàl Thạch Hà, càr Hà Tĩnh, Củ tịc Quôk hội ồng Trần Thanh Mẫn neh còp, pà phan hìu bơnhă geh sră dong kờl Dà lơgar, hìu bơnhă geh rài kis kal ke tàm ală kơnhoàl Hương Sơn, Thạch Hà mờ ƀòn dờng Hà Tĩnh.