Tàm nam 2024, broă lơh sa sươn sre sơrlèt uă kal ke, pơn jăt tai là bơta àng. Jơh gùt gah neh lơh ngan pơnđơl lơh geh mờ sơrlèt 4 tàm 5 broă jàu bơh Cíñ phủ dê jàu, tàm hơ̆ bơta pràn gơguh GDP jơh gùt gah pơgăp 3,3%; kờp jơh priă geh bơh tăc mờ lơgar ndai phan lơh geh bơh sươn sre, brê bơnơm, phan ròng tàm dà geh 62 tơmàn 500 tơlak dolar Mỹ lơh geh pa khà jơnhoa ngan rlau jơh bơh lài tus tŭ do. Đơs tàm dơ̆ pơrjum, Thủ tướng ồng Phạm Minh Chính ưn ngài mờ ki ngàm ală broă lơh geh bơh gah Broă lơh sa sươn sre dê neh lơh geh tàm nam 2024.

Bal mờ hơ̆, Thủ tướng neh ai gĭt loh ală bơta gam gơkòl, ờ hềt dipal kờñ pal bơsong tàm nam 2025 nàng gah broă lơh sa sươn sre tơngguh mhar tam gơl pràn, gơguh bơh 3,5% tus 4%. Thủ tướng dòn kơnờm là, gah broă lơh sa sươn sre tàm nam 2025 mờ tơngai tus rơ̆p tam gơl să pràn kơldang rlau tai, lơh gơlik phan bơna kă bro uă, geh cồng nha uă, bơta niam, mờ gơtùi; lơgar he gơgơs là dùl lơgar geh rài broă lơh sa sươn sre pa ngan, tơlir, ƀòn brê bơnơm, tàm pơdar, bơtàu tơngguh kơ̆ kơl jăp, song dơ pă loh làng, geh kơnòl.