Mpồl Cau lơh broă sa suơn sre càr Dăk Lăk pa bơyai lơh tơrbŏ bal gùng kă bro, yal mờ tăc phan geh lơh bơh suơn sre, hòi jà cau tàm mpồl, làng bol lơh broă sa suơn sre mờ ală mpồl lơh broă bal tus. 650 bơta phan krơi is, pơnrơ mờ OCOP geh yal tàm 34 hìu ràng tăc, ai geh bơta niam tơrbŏ bal tơn mờ mpồl lơh sa kă bro mờ cau ngui sa. Bơta pal kah ngan là bơdìh mờ broă yal phan geh lơh tơn, làng bol lơh broă sa suơn sre geh bơto sồr tàm broă yal, tăc phan tàm ală bơta măi mok sồ. Do geh sền là gùng lòt nàng tơrmù bơta ngài đah lơh sa mờ drà kă bro, tàm hơ̆ uă ngan là tàm bơta cau ngui sa ngai sơlơ geh uă bơta nàng rơwah tàm internet.

Ồng Lê Xuân Cường, Mpồl Cau lơh broă sa suơn sre sàh Ea Súp đơs là, bơta niam phan geh lơh bơh lơh sa suơn sre geh tơnguh, mơya bơta pràn tus bal drà kă bro, yal mờ lơh geh măt phan kă bro bơh làng bol lơh broă sa kung gam ờ pràn. Den tàng, tam gơl sồ pal geh bơto sồr loh làng nàng làng bol gơtùi ngui tơn tàm tơl broă lơh, yal tus mờ tăc phan geh lơh. “Làng bol lơh broă sa suơn sre he dê lơh geh ală bơta phan ngai sơlơ geh gơguh uă bè bơta niam. Mơya, broă ai ală phan geh lơh do tus mờ drà kă bro kung gam tìp uă kal ke. Tŭ do, lơh jăt Jơnau lơh nền tàm Pơrjum sồ 57 bơh Bộ Chính trị dê bè lơh pràn tam gơl sồ, he lơh ală tơngu me bơto sồr “at tê sơnio broă” ai làng bol lơh broă sa suơn sre ngui tam gơl sồ tàm tơl broă lơh bơh phan geh lơh bơh lơh sa suơn sre, yal tus mờ cau ngui sa tàm ală internet mpồl bơtiàn, ai phan geh lơh bơh lơh sa suơn sre, yal tus mờ cau ngui sa tàm ală internet mpồl bơtiàn, ai phan geh lơh bơh lơh sa suơn sre tus tàm ală drà kă bro”.

Mpồl Cau lơh broă sa suơn sre càr Dăk Lăk pà git, tàm tơngai tus, ală kấp mpồl rơ̆p pơn jăt tai dong kờl cau tàm mpồl rề ơnàng gah tăc phan tàm măi mok sồ, geh tìp mờ măi mok lơh gơs nền nòn mờ tơnguh uă bơta pràn lơh, kă bro. Bal mờ hơ̆ là dong kờl priă càn bơh Kes priă Dong kờl làng bol lơh broă sa suơn sre, bơsram tàp broă lơh dờp ai càn priă mờ anih priă mờ bơtơl jơnau git wă ai làng bol lơh sa, kă bro jăk in.

Mò H’Giang Niê, Chủ tịch Mpồl Cau lơh broă sa suơn sre càr Dăk Lăk đơs, tam gơl bồ tơngoh lơh sa, pơgồp bal mờ lơh sa mờ jơnau kờñ drà kă bro là jơnau kờñ kwơ màng. Tŭ làng bol lơh broă sa suơn sre git ngui măi mok, rơcang lài yal mờ jòi cau blơi, bơta kwơ phan geh lơh rơ̆p ờ geh tàm broă lơh sa mờ gam geh tơnguh uă tàm broă lơh gơs mờ kă bro phan. “Mpồl rơ̆p lơh jăt sùm nàng làng bol lơh broă sa geh tus bal mờ broă tam gơl sồ, drà kă bro mờ ală măi mok lơh gơs nền nòn phan. Bơh tŭ hơ̆, dong kờl phan geh lơh bơh làng bol lơh broă sa suơn sre dê gơs phan geh lơh uă sùm gùt nam, kơl jăp bơh tơl nam. Bol añ kơ̆p kờñ rơ̆p geh lơh gơs ală “làng bol sồ” mờ “mpồl lơh broă bal sồ” nàng lơh broă bal tàm broă tam gơl sồ”.