Tàm dơ̆ tìp mat kấp dờng, ồng Tô Lâm, Tổng Bí thư, Chủ tịch lơgar đơs nền Việt Nam sền dờng màng bơta gĭt gơ̆p lơh bơyô bal mờ lơgar Panama; jờng rơ uă ngan gơnoar bơh lơgar Panama dê mờ gơnoar là anih tờm tàm tơrbŏ bal gùng dà lềng, gùng rơndeh par, drơng broă mờ priă jền bơh tiah do dê.

Ồng Tô Lâm, Tổng Bí thư, Chủ tịch lơgar tơngŏ bơta pin dờn 2 lơgar rơ̆p pơn jat tai ngui geh cồng nha ală ù tiah lơh broă bal tàm ală gah kă bro, broă lơh sa suơn sre, gùng dà lềng, gùng rơndeh par, drơng broă, tam gơl sồ, sơlơ tơnguh tai bơta gĭt gơ̆p đah 2 gah bơtàu tơnguh jat gùng dà ngai sơlơ ngan ngồn, geh cồng nha mờ kơ̆ kơl jăp, tài bơta kwơ làng bol 2 lơgar dê. Ồng José Raúl Mulino Quintero, Kwang atbồ lơgar Panama đơs nền lơgar Panama sền Việt Nam là lơgar lơh broă bal ai lài ngan tàm tiah châu Á - Thái Bình Dương, crăp rcang lơh rƀàng tàm tơrbŏ bal nàng Việt Nam in pờ ơnàng gĭt gơ̆p mờ ală lơgar Mỹ Latinh. Bàr gah kung ring bal sơlơ tơnguh tai lơh broă bal rcang lài kơryan mờ cau lơh tìs gan tiah nhàr lơgar mờ pơgồp bal tàm ală anih cribơyai uă lơgar. Tơnơ̆ dơ̆ tìp mat kấp dờng, 2 nă kwang đơng lam bồ sền dơ̆ tàm jàu uă sră nggal lơh broă bal tàm ală gah jun pơndiang phan dà lềng, broă lơh sa suơn sre, lòt nhơl, gah rơndeh par, tă dia phan lik mut tàm lơgar bơh tiah nhàr lơgar mờ bơto bơtê.