Tàm dơ̆ jàu khà jờng, Mpồl bơyai lơh neh jàu 2 khà A, 4 khà B; 6 khà C mờ 10 khà pơn jờng tus mờ ală cau  cih jơnau, mpồl cau cih jơnau. Mpồl bơyai lơh kung neh sền sơ wì, rơwah 34 jơnau cih geh bơta jak ngan, pơyoa tus bal Khà jờng Sră ƀăo gùt lơgar bè bơt bơtàu Đảng (Khà jờng Mŭt Mơ̆ biàng) dơ̆ IX, nam 2024. Do kung là ală jơnau cih jak ngan, tàm khà 210 jơnau cih geh rơwah. Khà jờng nam do neh cih dờp ală tă pơgồp uă ngan tàm broă cih yal ală bơta broă lơh bơt bơtàu Đảng, ngan là broă lơh bơt bơtàu, lơh niam wơl Đảng, sền gàr ală bồ tơngoh, tam dră mờ rcang lài kơryan sa kuề sa kuà mờ bơta ờ niam. Is ồn, uă jơnau cih neh cèng wơl ală jơnau yal jrô ơnàng ngan, lơh geh bơta tềl tơngŏ jơh nùs tàm mpồl bơtiàn.

Kung tàm dơ̆ jàu khà jờng, mò Huỳnh Thị Chiến Hòa, Phó Ƀí thư Duh broă sùm Tỉñ ủy càr, Củ tịc Mpồl duh broă làng bol càr Dăk Lăk neh lam lơh Khà jờng sră ƀăo bè bơt bơtàu Đảng càr Dăk Lăk dơ̆ VII, nam 2025.