Tàm pơrjum, ala mat Mpồl rơndăp broă Tỉñ ủy càr Gia Lai yal ală Jơnau lơh nền bơh Mpồl Lơh kơnòl broă sùm Tỉñ ủy càr Gia Lai dê, geh: ntrờn ồng Nguyễn Trường Sơn - Phó Ƀí thư Kwang bàng Mpồl duh broă đảng ƀộ ƀòn drà dờng, Củ tịc Anih duh broă ƀòn drà dờng Ayun Pa dờp lơh broă tàm Sở Gùng lòt rê Jun pơndiang. Ồng Trần Anh Tuấn - Phó Kwang atbồ Sở Jak chài mờ Măi mok càr Gia Lai geh ntrờn, sồr mut bal tàm Mpồl Duh broă Đảng ƀộ, Mpồl Lơh kơnòl broă sùm Kwang bàng Mpồl duh broă đảng ƀộ ƀòn drà dờng Ayun Pa, at gơnoar broă Phó Ƀí thư Kwang bàng Mpồl duh broă đảng ƀộ ƀòn drà dờng tơngai lơh broă bơh nam 2020-2025; Tỉñ uỷ càr Gia Lai yal tơngĭt ồng Anh Tuấn nàng Mpồl duh broă làng bol ƀòn drà dờng Ayun Pa in pồ at gơnoar broă Củ tịc Anih duh broă làng bol ƀòn drà dờng tơngai lơh broă bơh nam 2021-2026. Ồng Phan Hồ Giang, Phó Ƀí thư Tỉñ Đoàn càr, geh ntrờn dờp lơh broă tàm Sở Jak chài mờ Măi mok.

Đơs tàm pơrjum, ồng Rah Lan Chung, Phó Ƀí thư Tỉñ ủy càr Gia Lai sồr ală kwang bàng geh pồ, ntrờn tàm gơnoar broă pa pal lơh jat nùs nhơm geh kơnòl, rcang lơh kơnòl broă, ngui niam bơta pràn jak nàng lơh sir niam ngan kơnòl broă.