Do là jơnau yal geh yal tàm pơrjum tơn jơh broă lơh lơh broă sồ 64 nam 2018 bơh Mpồl lơh kơnòl broă sùm Tỉñ ủy càr Gia Lai dê, bơyai lơh tàm drim ngai 29/11. Yal tàm pơrjum pà gŏ, bơh nam 2015 tus tŭ do, càr Gia Lai neh jơh nùs rơndăp tăp sèng, tơmut bal mờ tơn jơh lơh broă ală mpồl lơh broă dà lơgar lơh broă ờ geh cồng nha halà geh gơnoar, kơnòl broă tàm rơndăp rơndồl. Cồng nha, càr neh tơrmù 189 mpồl lơh broă dà lơgar, ndrờm mờ 17,5%. Tus lồi nhai 06/2024, jơh gùt càr gam 891 mpồl lơh broă dà lơgar.

Tàm gah bơto bơtê- geh khà dờng ngan rlau jơh tàm ală broă lơh dà lơgar dê- càr neh tơrmù 86 hìu bơsram mầm non mờ kấp pe, bal mờ 406 tiah bơsram. Bè gah lơh sơnơm, càr rơndăp wơl ală hìu sơnơm kơnhoàl gơ gơs mpồl lơh broă geh uă gơnoar, gơmù 24 hìu sơnơm bơh sơn rờp. Ală mpồl lơh broă niam chài, tàp pràn să jan kung geh rơndăp tăp sèng tơrmù wơl, gơmù rlau 39% anih lơh broă kấp kơnhoàl. Mờ nùs nhơm jơh nùs lơh ngan lơh jat niam ală jơnau sồr bơh Dà lơgar dê, càr Gia Lai neh lơh sir ring bal ală jơnau lơh nền bè tiah lơh broă tàm ală mpồl lơh broă dà lơgar nam 2023, lơh geh ală bơta ai broă tơrmù broă lơh mờ rơndăp tăp sèng broă lơh sră nggal gơnoar atbồ. Càr kung gam lam lơh ală broă lơh nàng kờñ lơh pràn rơndăp tăp sèng mờ tam gơl ală mpồl lơh broă, gàr niam cồng nha lơh broă mờ ờ lơh gơrềng tus bơta niam drơng broă dà lơgar dê.