Càr Lâm Đồng pơgồp bal mờ Hìu bơsram Kơlôi sơnơng Chính trị dà lơgar Hồ Chí Minh bơyai lơh Pơrjum bơyai bơta chài “Broă bơtàu tơnguh càr Lâm Đồng: Bơta pràn bal mờ lơh mhar”. Tơnơ̆ mờ rơndăp tăp sèng mpồl lơh broă sră nggal, càr Lâm Đồng geh uă bơta pràn nàng bơtàu tơnguh. Càr geh ù tiah dờng ơnàng bơh tiah bơnơm tus tàm tiah jăt gah dà lềng, bơta niam uă bơta, bơta pràn bè lơh sa suơn sre măi mok pa, lòt nhơl, năng lượng, phan kwơ geh is tàm ù bal mờ bơta niam chài krơi is geh uă bơta.

Do là dơ̆ niam nàng lơh gơs ală gah lơh sa, tiah gơguh lơh sa pa mờ tơnguh broă pơgồp bal tiah. Mơya, càr kung gam kong gơtìp mờ uă bơta lòng bè phan bơna ờ hềt ndrờm bal, pơgồp bal tiah gam ờ pràn, broă lơh sa ờ hềt di pa, mờ bơta pràn geh, bơta jăk cau lơh broă bal mờ bơta pràn tam gơl pa bơceh lơh ờ hềt di pal mờ jơnau kờñ bơtàu tơnguh.

Đơs tàm pơrjum bơyai, ồng Y Thanh Hà Niê Kdăm, Bí thư Tỉnh ủy càr Lâm Đồng đơs là, ală broă lơh gơguh lơh sa ờs mờng ờ gam tơl pràn nàng lơh geh pràn mhar, den tàng càr Lâm Đồng pal jòi geh bơta pràn bơtàu tơnguh pa mờ bồ tơngoh kwơ màng pa gơdờp bal mờ rài tam gơl sồ mờ gơguh lơh sa tơlir. “Càr kờñ geh dùl “bơnàng jă” pa, dùl bồ tơngoh kwơ màng lơh mhar nàng sền gŏ bơta pràn càr Lâm Đồng dê tàm lơgar bal mờ tiah do. Den tàng, Pơrjum bơyai bơta chài ờ mìng là pơrjum nàng he sền wơl ală broă neh lơh gơtùi, mờ kwơ màng rơlao là anih nàng cri bơyai song dơ pă tàm ală jơnau jăk chài bal mờ geh tàm mùl màl nàng jòi geh ală gùng dà broă lơh geh bơta pràn mhar, geh cồng nha, lơh jăt mùl màl jơnau kơ̆p kờñ bơtàu tơnguh càr Lâm Đồng dê tàm tơngai pa”.

Ồng Đoàn Minh Huấn, Phó Pơgru dờng, Tiến sìh, Kwang Lam bồ Hìu bơsram Kơlôi sơnơng Chính trị dà lơgar Hồ Chí Minh đơs nền, càr Lâm Đồng gam ngui uă bơta pràn pơnrơ ngan bè bơta niam, lơh sa suơn sre măi mok pa, năng lượng lơh geh wơl, phan kwơ geh is tàm ù mờ lòt nhơl. Do là bơnàng jă nàng càr bơtàu tơnguh ală broă lơh sa tơlir, lơh sa gơlòt bal, lơh sa dà lềng mờ ală gah lơh sa mờ mai mok lơh gơs phan. “Pơrjum bơyai tơrgùm cri bơyai ală kơrnoăt boh lam broă lơh krơi is nàng lơh geh bơta pràn mhar ai bơtàu tơnguh mờ ngui gơnoar bơh ală tiah lơh sa, tàm hơ̆ uă ngan là lơh sa cau dùl nă să lơh is tàm broă tam gơl pa broă gơguh lơh sa càr Lâm Đồng dê. Wèt bơta pràn tơn tàm broă gơguh lơh sa bàr sồ, tàm hơ̆ pal lơh loh ală gùng dà broă lơh bè tam pà kấp, tam pà gơnoar, tơnguh tiah bơcri priă kă bro, tol7nguh uă bơta niam đơng lam mờ geh cồng nha atbồ broă bơtàu tơnguh”.