Tơlik jơnau kờñ gơguh tai lơh sa 2 nơm khà tơngai bơh nam 2026 tus nam 2030, càr Khánh Hòa gam lơh pràn gơ hòi gơ jà bơcri priă tàm ală tiah lơh sa, tiah lơh sa mờ măi mok nàng lơh gơlik bơta gơn kơnờm bơtàu tơnguh. Lồi nhai 5 pa do, Mpồl atbồ Tiah lơh sa mờ Tiah lơh sa mờ măi mok càr neh jàu sră cơng tàm cih tàm sră bơcri priă ai 13 rơndap broă lơh in, mờ kờp jơh priă bơcri mờr 7 rbô 500 tơmàn đong. Tàm hơ̆, rơndap broă lơh Tiah lơh sa mờ măi mok Ninh Thọ ơnàng 327 lồ, priă bơcri lơh rlau 3 rbô 800 tơmàn đong, geh kơp kơnờm rề ơnàng bă ù lơh sa mờ măi mok mờ gơ hòi gơ jà tai cau bơcri priă tus bal.

Ala mat mpồl lơh sa kă bro geh rơ wah lơh cau tờm bơcri priă lơh rơndap broă, ồng Nguyễn Tuấn Anh, Kwang lam bồ dờng Kông ty pơgồp bal Tiah lơh sa mờ măi mok Stavian pà git, sră nggal bơcri priă tŭ do geh bơsong mhar ngan, lơh gơlik bơta ƀuơn mpồl lơh sa kă bro in: “Pal đơs là ờ hềt geh bơh lài tus tŭ do mờ bol hi kung ờ gơtùi kơlôi là bol hi gơtùi geh mat tŭ do mhar bè do. Tàm pơgap mìng 4 nhai, gơtùi sền swì jơh sră nggal mờ jàu cau tờm bơcri priă lơh in, den hơ̆ là dùl bơta sơrbac mhar krơi ngan pơndrờm mờ lài do”.

Bal mờ gơ hòi gơ jà ală rơndap broă lơh pa, broă tă bơsong ală bơta gơ kòl adat boh lam nàng tơn jŏ tơngai lơh broă ai ală rơndap broă lơh tŭ do in kung pơgồp bơnah gàr kơ̆ bơta pin dờn bơh ală mpồl lơh sa kă bro dê. Uă mpồl lơh sa kă bro dờng tàm Tiah lơh sa Vân Phong neh geh tam gơl tơnguh tơngai lơh broă bơh 50 nam gơguh tus 70 nam.

Gơwèt mờ ală rơndap broă lơh phan bơna tiah lơh sa mờ măi mok, tŭ tơngai lơh sir sră pơ nggal bơcri priă lơh geh kuơ dờng ngan. Sră pơ àr sơlơ mhar, bă ù lơh sa mờ măo mok sơlơ gờñ ai ngui den rơp lơh gơlik bơta ƀuơn gơ hòi gơ jà ală cau bơcri priă tus bal mờ rề ơnàng lơh sa. Jat Mpồl atbồ tiah lơh sa mờ tiah lơh sa mờ măi mok càr Khánh Hòa, cồng nha do gơtùi lơh geh bơh broă tam gơl pa broă lơh đơng lam, sơlơ tàm pơgồp bal đah ală sờh, gah broă lơh mờ dong kờl mpồl lơh sa kă bro bơh tŭ tơngai rơcang sră pơ àr tơn. Ồng Trần Minh Chiến, Lam bồ Mpồl atbồ Tiah lơh sa mờ Tiah lơh sa mờ măi mok càr Khánh Hòa pà git: “Dơ̆ jàu tàm ngai 25/5 pa do bơh tŭ cih tàm sră tus tŭ ring bal gùng dà, broă lơh mìng gam 4 nhai. Jơh ală broă bol hi ndrờm tơrmù bơh 30 tus 50% sră pơ àr gơnoar atbồ”.

Ồng Lê Huyền - Phó Chủ tịch Anih duh broă Làng bol càr Khánh Hòa pà git, càr gam ai lài lam lơh phan bơna gùng lòt tàm tơrbŏ bal mờ ală tiah lơh sa mờ măi mok, tiah lơh sa; mờ kung sac rơ wah ală cau bơcri priă geh bơta pràn bè priă jền, mờng chài mờ măi mok nàng lam lơh ală rơndap broă lơh dờng: “Bè đah Anih duh broă Làng bol den bol hi neh lơh ngan rao, mơya pơn đơl lơh ngan rlau tai tàm tŭ tơngai lòt bal mờ ală mpồl lơh sa kă bro. Bơdìh mờ broă hòi jà cau bơcri priă den bol hi kung pal gàr ală bơta pal geh, ală bơta pal jat, is ồn là ală bơta gơ rềng tus phan bơna tàm tơrbŏ bal mờ ală tiah lơh sa mờ măi mok nàng gàr cau bơcri priă in tŭ lam lơh den lài ngan là gơtùi lơh geh bơta ƀuơn ngan rlau jơh, dơ̆ 2 là geh cồng nha ngan rlau jơh, tàm hơ̆ geh cồng nha bơh cau bơcri priă dê, cồng nha bơh ală cau bơcri priă tus bal dê mờ kờp bal là cồng nha lơh geh càr in”.

Bơh broă tơrmù sră nggal bơcri bơcri priă tus tă bơsong ală bơta gơ kòl bè phan bơna mờ ù lơh rơndap broă, càr Khánh Hòa gam rơhời lơh gơlik bơta niam nàng ală rơndap broă lơh in gờñ geh lam lơh. Do kung là bơnàng jă nàng càr pơn jat tai gơ hòi jà priă bơcri pa, wèt tus jơnau kờñ gơguh tai 2 nơm khà tàm ală nam tus.