Mờr 15 nam kờp bơh ngai geh dờp broă lơh bơcri priă lơh, tus lồi nam 2025, Rơndăp broă lơh Tiah ơm rlô să kwơ màng Cù Lao Mái Nhà tàm sàh Ô Loan, càr Dăk Lăk pa ngan ngồn sơnđờm mut lơh. Rơndăp broă lơh ơnàng mờr 200 lồ, mờ kờp jơh priă bơcri lơh 5 rơbô tơmàn đong, geh rơndăp ù tiah là tiah lòt nhơl ơm rlô să dà lềng dờng màng mờ uă bơta jơnau kờñ 6 sơrmañ. Kung bè uă làng bol ơm kis jat kềng gah dà lềng càr Dăk Lăk dê ồng Võ Văn Ngầu, ơm tàm sàh Ô Loan kơ̆p kơnờm do rơ̆p là bơta chồl tơnguh lơh kah wơl bơta pràn lòt nhơl dà lềng bơh tiah do dê. “Làng bol kơ̆p jŏ ngan rao. Dilah rơndăp broă lơh lam lơh niam den tiah do rơ̆p gơ gơs tiah àng bơh càr dê”.

Bulah sơnđờm mut lơh ur ar mờ uă jơnau hơ pơr gon, mơya tơnơ̆ mờr ngùl nam mut lơh, rơndăp broă lơh 5 rơbô tơmàn đong kung mìng lơh geh mpồl broă 40 tơmàn đong lơm. Do kung là bơta bal tàm uă rơndăp broă lơh dờng tàm càr Dăk Lăk dê. Jat tơrgùm kờp, jơh gùt càr geh 39 rơndăp broă lơh lòt nhơl geh ai gơnoar bơcri priă lơh, tàm hơ̆ geh tus 28 rơndăp broă lơh mờ kờp jơh khà priă bơcri lơh rlau 16 rơbô 850 tơmàn đong gam gơtìp kal ke, kòl yan jŏ jòng.

Nàng chồl mhar tŭ tơngai mut lơh ală rơndăp broă lơh tờm, càr Dăk Lăk neh tơnggơs ală mpồl lơh broă mìng lơh dùl kơnòl broă bơsong ală broă kòl yan; pờ “dơ̆ lơh uă 30 ngai mang tă bơsong kòl yan ai mat ù”. Uă mpồl lơh broă lòt tơn tàm kấp hơ đơm nàng bơsong ală bơta gam geh, lơh mhar tŭ tơngai mut lơh.

Jat ồng Đào Mỹ, Phó Củ tịc Anih duh broă Làng bol càr Dăk Lăk, broă bơsong tơn jơh ală rơndăp broă lơh lơyài lam lơh ờ mìng nàng pleh gơbàn pơhì pơhà bơta pràn ù tiah lơm mờ gam dong bơta lơh geh ală bơta pràn gơguh tai pa ai lòt nhơl nhơl tiah do in. “Bol añ sền gròi tus broă jòi ală cau bơcri priă ngan ngồn. Rơ̆p geh jơnau hơ ngan ngồn ai tơl rơndăp broă lơh in. Ai ală cau bơcri priă lơi ờ lam lơh den bol añ rơ̆p geh broă lơh bơsong jat jơnau sồr, nàng lơh geh ală bơta ai ală bơta pràn bơh càr dê pal geh ngui, pal geh lơh jat niam, is ồn là ală rơndăp broă lơh geh ală tiah kwơ màng”.

 Ndrờm mờ gơ hòi gơ jà bơcri priă, tă bơsong ală tiah gơ kòl, sơlơ tơnguh tai tŭ tơngai mut lơh ală rơndăp broă lơh lòt nhơl dờng, Dăk Lăk kung gam rơndăp tăp sèng wơl bal gah lòt nhơl tàm ù tiah pa tơmŭt bal. Ồng Trần Hồng Tiến, Kwang lam bồ Sờh Niam chài, Tàp pràn să jan mờ Lòt nhơl càr dê pa gĭt, càr neh sơnđờm lơh loh geh bơhiàn niam chài is lòt nhơl bơh Dơ̆ lơh chờ kơphê, Dơ̆ lơh chờ Sầu riêng pơgồp bal mờ bơta pràn broă lơh sa suơn sre; dơ̆ lơh chờ ka ngừ dà lềng dờng, dơ̆ lơh chờ hòi dan lòt lơh ka pơgồp bal mờ niam chài dà lềng. Dăk Lăk kung neh bơtàu tơnguh geh uă ƀòn lòt nhơl mpồl bơtiàn pơgồp bal mờ ù tiah niam chài cing mồng Tây Nguyên dê.

Tơngai tus, càr Dăk lăk rơ̆p ngui niam bơta ờ drờm bal đah tiah jat kềng gah dà lềng đah mat tơngai lik mờ tiah kơh bơnơm đah mat tơngai mut nàng lơh geh ală phan bơna di pal mờ tơl mpồl năc dê. “Bol añ sền gĭt rơ̆p lơh ală bơta kal ke gơ gơs bơta ƀuơn nàng bơtàu tơnguh lòt nhơl. Tiah đah mat tơngai mut ai niam chài cing mồng, kơphê lơh bơta tờm. Tiah đah mat tơngai lik bơtàu tơnguh lòt nhơl ơm rlô să, ngui ù tiah gam bè ờs nàng gơ hòi gơ jà năc lòt nhơl. Bol añ ờ bơtàu tơnguh làm uă mờ là rơwah tơl mpồl năc di pal”.

Tơnơ̆ dùl nam pờ ơnàng ù tiah “Brê- dà lềng”, càr Dăk Lăk gam geh ală broă bơsong sơn rờp gơwèt mờ broă lơh kal ke bè broă lơh mờ bơta jrô sền gĭt lòt nhơl dê. Uă rơndăp broă lơh ơm rlô să dờng geh sơlơ tơnguh; ală tiah gơ kòl bơcri priă geh sền sơ wì tă bơsong, tàm tơrbŏ bal geh bơta tềl tơngŏ niam ngan.

 Gùng rơndeh lòt mhar Khánh Hoà- Buôn Ma Thuột neh mờr ai lòt rê; ală vịñ dà lềng niam ngan rlau jơh càr dê geh tơmŭt tàm sră cih mat gơ hòi gơ jà bơcri priă... Bơta ngài đah ù tiah brê bơnơm mờ dà lềng gam geh tơn lơyah wơl, dùl mpồl ù tiah lòt nhơl geh bal bơta dờng màng sơrmañ ală lơgar mờ bơhiàn niam chài is bơh càr Dăk Lăk dê gam hời rơ hời geh lơh geh.

Oh mi mờ ală bơyô kờñ pờ sền wơl jơnau cih dơ̆ 1, dan pờ jat  gùng link: https://vov4.vov.vn/kho/van-hoa-van-hoa/rot-jonau-cih-lot-nhol-car-dak-lak-joi-gung-tam-gol-pran-tam-u-tiah-pa-jonau-cih-sonrop-lot-nhol-car-dak-lak-tono-ala-gol-gung-o-niam-518024.vov4