Pơn jat tai ală broă lơh tàm dơ̆ lòt còp kâp Dà lơgar tus lơgar Philippines, mho ngai 31/5 (jat jơ tiah do), ồng Tô Lâm - Tổng Bí thư, Chủ tịch lơgar bal mờ Pơ ùr mờ Mpồl cau ala mat kâp dờng lơgar he neh tus bal mờ đơng lam dơ̆ tìp mat mpồl bơtiàn, mpồl lơh sa kă bro mờ cau geh jơnau git wă jrô cau Việt Nam tàm Philippines.

Tơm boh bơr đềt mềr mờ ală cau ala mat, Tổng Bí thư, Chủ tịch lơgar jờng rơ ală broă lơh ngan bơh mpồl bơtiàn cau Việt Nam dê tàm lơgar Philippines tàm broă gơ rờm bal mờ mpồl bơtiàn lơgar do, sền gàr bơta niam chài jơi bơtiàn, geh ală broă lơh chồl tơnguh bơta git gơp lơh sa kă bro phan đah 2 lơgar. Đơs sùm tàm ală dơ̆ tìp mat mờ kwang đơng lam bồ kâp dờng bơh lơgar Philippines dê, Tổng Bí thư, Chủ tịch lơgar rơp pơn jat tai sồr Chính phủ Philippines pơn jat tai sền gròi dong kờl làng bol geh gơnoar adat boh lam kơ̆ kơljap, gàr kơ̆ rài kis, gơ rờm bal mờ mpồl bơtiàn lơgar Philippines. Tổng Bí thư, Chủ tịch lơgar đơs nền, gùng dà broă lơh ờ tam gơl bơh Đảng mờ Dà lơgar dê là sùm sền gròi tus mpồl bơtiàn cau Việt Nam tàm lơgar ndai, sền mpồl bơtiàn là dùl mpồl ờ gơtùi tam cah is mờ là bơta gơn kơnờm kuơmàng ngan bơh mpồl bơtiàn jơi bơtiàn Việt Nam dê. Mờ tàm tơngai tus, bàr pe gùng dà broă lơh gơ wèt mờ cau Việt Nam tàm lơgar ndai rơp pơn jat tai geh tam gơl nàng kờñ lơh gơlik bơta niam ai làng bol he tàm lơgar ndai in pơn jat tai geh uă bơta tă pơgồp rlau tai ai ƀòn lơgar tờm, ai dà lơgar in.