Tàm dar pơrjum, Mpồl duh broă Làng bol càr Gia Lai neh sền wơl, ai geh broă tam pà priă dà lơgar di mơ tơngai bơh nam 2026 tus 2030; lơh niam broă bơcri priă dà lơgar nam 2026; broă bơtàu tơnguh lơh sa suơn sre, ƀòn lơgar, bơta chài măi mok, hìu ơm mpồl bơtiàn, bơtàu tơnguh cau lơh broă bal mờ rài kis broă lơh broă sa mpồl bơtiàn.

Pal kah ngan, Mpồl duh broă Làng bol càr Gia Lai ring bal jơnau lơh nền tàm pơrjum bơtơl rơlao 4 rơbô 700 tơmàn đong bơh priă tơnguh priă geh bal mờ kes priă tam gơl priă tus nam 2026, tơnguh khà priă kờp jơh priă bơcri nam 2026 tus mờr 18 rơbô tơmàn đong. Đơs tàm dơ̆ tơn jơh pơrjum, ồng Rah Lan Chung, Chủ tịch Mpồl duh broă Làng bol càr Gia Lai sồr Anih duh broă Làng bol càr Gia Lai bal mờ ală sờh, gah lơh broă, ală sàh sơnah ƀòn mhar lơh geh cồng nha ală jơnau lơh nền tàm pơrjum pa geh ring bal, gờñ ai jơnau lơh nền tàm pơrjum mŭt tàm rài kis, ai geh bơta pràn bơtàu tơnguh mhar mờ kơl jăp ai càr Gia Lai in.