Tus ngai 30 nhai 5, ală mpồl lơh broă geh gơnoar tàm gùt lơgar neh gŏ rơlao 2 rơbô dơ̆ broă, lơh glài rơlao 1 rơbô 600 dơ̆; kờp jơh priă lơh glài tìs rơlao 17 tơmàn 800 tơlăk đong, bơta kwơ phan kă bro gơtìp tìs mờr 115 tơmàn 6 tơlăk đong.

Dờp broă lơh ngan bơh ală bộ, gah lơh broă bal mờ ală càr, ƀòn dờng dê, Phó Thủ tướng ồng Hồ Quốc Dũng đơs là broă tam dră, lơh glài tìs kung gam ờ hềt di pal mờ jơnau kờñ, tàm tŭ nùs nhơm git wă lơh jăt adăt boh lam bè ngui bơta ngăc ngar bơh uă mpồl lơh broă, cau dùl nă să gam ờ pràn. Phó Thủ tướng sồr ală bộ, gah lơh broă, ală càr, ƀòn dờng tam pà loh cau, loh broă, tơnguh cồng nha lơh jăt gơnoar ngui bơta ngăc ngar mờ lơh ngan tơnguh cồng nha lơh glài tìs ờ uă ngan 20% pơn drờm mờ nam 2025.