Là dùl tàm 84 nă cau geh pồ gơ kờn Cau ala mat Mpồl duh broă Làng bol càr Dăk Lăk tơngai lơh broă bơh nam 2026 - 2031, mò H’Giang Niê, Ƀí thư Đảng ủy, Củ tịc Mpồl duh broă Làng bol sàh Ea M’Droh, pơn jat tai geh bơta pin dờn bơh cau tĕ khà dê tơnơ̆ dùl tơngai mut tàm Mpồl duh broă Làng bol càr. Jat mò H’Giang, broă geh pồ wơl ờ mìng là bơta cih dờp gơwèt mờ să tờm dê lơm mờ gam ai tơlik jơnau sồr uă rlau tai bè broă lơh geh ngan. Tơl pang sră tĕ khà bơh làng bol dê pơyoa ngan ngồn là bơta pin dờn bè dùl bơta tam gơl, bơtàu tơnguh pràn kơl dang rlau tai bơh ù tiah do dê. Mò H’ Giang, pà gĭt: “Tàm broă lơh gơnoar atbồ ƀòn lơgar 2 kấp añ sền gĭt gơnoar bơh añ dê là “rơbàng tơrbŏ bal” tơn mờ rềp làng bol ngan rlau jơh. Añ rơ̆p gàr bơta tàm yal tơngĭt rềp mềr, đơs bơta geh ngan mờ di tŭ ală jơnau đơs jơnau dan di pal ngan bơh cau tĕ khà in tus ală dơ̆ pơrjum Mpồl duh broă Làng bol càr, gàr niam ală Jơnau lơh nền tàm pơrjum tŭ ai lơh jat pal ngan ngồn là “gơkờn” mờ “di” mờ jơnau kờñ ngan ngồn bơh ală tiah dê. Tàm hơ̆, añ is ồn sền gròi tus mờ broă lơh jat ală broă lơh dong kờl jơi bơtiàn, lơh pràn tàm tơrbŏ bal lòt nhơl broă lơh sa suơn sre pơgồp bal mờ prap gàr niam chài, dong làng bol bè ờs broă lơh sa mờ brồ guh lik klàs rƀah kơnhăp kơ̆”.

Ai gơwèt mờ mò Ngô Thị Minh Trinh, Ƀí thư Đảng uỷ, Củ tịc Mpồl duh broă Làng bol sàh Ea Knuếc, càr Dăk Lăk dờp gŏ tàm tơngai bơtàu tơnguh pa, cau ala mat làng bol pồ ờ mìng iăt kơno, đơs wơl ngan ngồn nùs nhơm cau tĕ khà, sền gàr gơnoar kwơ di mờ adat boh lam làng bol dê lơm mờ gam kờn pal geh nùs nhơm khin cha, bồ tơngoh jak mờ bơta lơh ngan bơh să tờm dê, tus bal jrô rlau tai tàm broă lơh lơh geh mờ jat sền broă lơh dong kờl, is ồn tàm ală gah mờ tiah do geh bơta ƀuơn bơta pràn mơya ờ hềt ngui geh cồng nha. Mò Ngô Thị Minh Trinh, pà gĭt: “Do là dùl bơta chờ hờp ngan gơwèt mờ să tờm añ mờ añ sùm kơlôi sơnơng là chờ hờp mờ geh kơnòl sùm lòt bal mờ gơ̆p. Den tàng bè hơ̆ mờ pal tơngŏ niam ngan rlau jơh gơnoar cau ala mat làng bol dê. Gơwèt mờ càr Dăk Lăk den bơta pràn là bơtàu tơnguh broă lơh sa suơn sre, mờ gơnoar là dùl nă cau ala mat, añ rơ̆p tơrgùm ngan nàng bal mờ gơnoar atbồ ală kấp bơt bơtàu ală bơta kwơ gơwèt mờ ală phan lơh geh bơh broă lơh sa suơn sre geh kwơ lơh sa uă nàng cèng wơl bơta kơ̆ kơl jăp ai làng bol in kung bè bơta bơtàu tơnguh bal bơh càr dê mờ is ồn là tơrgùm tàm broă gơguh lơh sa 2 nơm khà sồ”.

Ngan ngồn pà gŏ, càr Dăk Lăk geh bơta kwơ dờng bè broă lơh sa suơn sre mờ gam ờ pràn bè broă lơh sa mờ măi mok- drơng broă, jak chài măi mok. Tơngai lơh broă bơh nam 2026 - 2031, Cau ala mat Mpồl duh broă Làng bol mờ anih lơh broă làng bol pồ tàm càr, rơ̆p kờñ pal lơh geh uă ngan jơnau kơ̆p kờñ bơh làng bol dê tàm uă gah, ngan là bơto bơtê, tam gơl pa bơceh lơh- sơnđờm mut lơh broă, ù tiah, lơh sa măi mok lơh gơlik phan, bơt bơtàu mat kă bro mờ tam klăc bal drà kă bro.

Tơnơ̆ tŭ đùh sră, bơta sền gròi uă ngan rlau jơh bơh cau tĕ khà dê là ală cau ala mat mờ he pồ geh rơ̆p lơh jat tus khà lơi ală broă neh đơs tàm broă lơh lơh broă dê. Jat ồng Trần Xuân Định, Lam bồ Mpồl lơh broă Mặt trận, ƀòn drà 2, sơnah ƀòn Thành Công, càr Dăk lăk, cau tĕ khà jat sền mờ sồr pal geh ală jơnau hơ lài mờ dơ̆ tĕ khà geh tơngŏ mờ cồng nha lơh broă tàm tơl nam bơh tơngai lơh broă dê: “Ală kwang bàng là cau ala mat làng bol, là rơbàng tàm tơrbŏ bal đah nùs nhơm Đảng mờ nùs nhơm Làng bol dê. Añ kơ̆p kờñ ngan là ală kwang bàng ndrờm rềp mềr, tam klăc bal mờ làng bol, gĭt wă rài kis làng bol dê nàng bơt bơtàu càr bơtàu tơnguh lòt guh tàm tơngai tus”.

Jat mò Cao Thị Hòa An, Kwang bàng Mpồl duh broă Đảng dà lơgar, Phó Ƀí thư Lơh broă sùm Tỉñ ủy càr, Củ tịc Mpồl duh broă Làng bol càr, Củ tịc Anih duh broă tĕ khà càr Dăk Lăk, dơ̆ tĕ khà cau ala mat Quôk hội khoă XVI mờ Cau ala mat Mpồl duh broă Làng bol ală kấp tơngai lơh broă bơh nam 2026-2031 tàm ù tiah càr dê neh geh rcang lài mờ bơyai lơh niam ngan, gàr niam làng bol lơh tờm, di mờ adat boh lam, lơngăp lơngai mờ cồng nha niam bơnĕ.

84 nă cau ala mat Mpồl duh broă Làng bol càr khoă XI geh cau tĕ khà pin dờn pồ rơwah là ală cau pơn rơ jak bè nùs nhơm mờ bơta pràn jak, ala mat ai nùs nhơm, bơta kơ̆p kờñ bơh Làng bol ală jơi bơtiàn tàm càr dê. Do là bơta chờ hờp, mơkung là kơnòl dờng màng, sồr tơl nă cau ala mat pal sùm lơh ngan, lơh jat niam gơnoar broă tàm tơngai lơh broă pa dê: “Ală cau ala mat, ală cau pơn rơ jak bè bơta pràn jak mờ nùs nhơm, kờñ lơh jat niam nùs nhơm geh kơnòl, gàr niam bơta tàm yal tơngĭt bal rềp mềr mờ đơs ngan ngồn jơnau đơs bơh cau tĕ khà dê. Mờ ală cau ala mat pal jơh nùs tus bal lơh nền ală broă kwơ màng bơh càr dê mờ jat sền niam broă lơh jat ală gùng dà broă lơh, adat boh lam bơh tiah do dê, nàng kờñ tơnguh uă cồng nha lơh broă bơh anih lơh broă làng bol pồ tàm tơngai tus”.

Gơtùi gŏ, cồng nha bơh dơ̆ tĕ khà dê ờ mìng ơm wơl tàm broă lơh sir ală broă rơndăp jăt jơnau sồr dê lơm mờ gam pờ geh dùl gơl gùng  pa bal mờ uă kơ̆p gơn. Ală cau ala mat geh rơwah tŭ do rơ̆p cèng bal bơta pin dờn bơh cau tĕ khà dê, sơnđờm gùng lòt lơh jat kơnòl broă bơh he dê mờ nùs nhơm jơh nùs jơh tồr, lơh broă ngan ngồn, pơgồp bơnah lam càr Dăk Lăk bơtàu tơnguh mhar mờ kơnhăp kơ̆.