Tàm dơ̆ lơh broă, Ƀí thư Thàñ ủy ƀòn dờng Hải Phòng ồng Lê Tiến Châu đơs nền, làng bol Việt Nam sùm cih kah mờ gĭt ưn ngài ală nùs nhơm jơh nùs jơh tồr, bơta dong kờl dờng màng bơh làng bol lơgar Bulgaria dê tàm dơ̆ tam lơh ai geh lơngăp lơngai jơi bơtiàn, bơt bơtàu Dà lơgar.

Kwang atbồ lơgar Bulgaria ồng Rumen Radev đơs nền, lơgar Bulgaria sùm sền dờng màng bơta gĭt gơ̆p lơh bơyô bal bơh yau niam bơnĕ đah 2 lơgar dê. Tàm dơ̆ lòt còp ƀòn dờng Hải Phòng dơ̆ do, Kwang atbồ lơgar Bulgaria ồng Rumen Radev kơ̆p kờñ ƀòn dờng Hải Phòng cribơyai mờng chài bơtàu tơnguh tàm jơh bal gah ờs mờng mờ tàm tơngai pa tŭ do; mờng chài bơh ƀòn dờng dê tàm gơ hòi gơ jà bơcri priă, bơsong ală broă geh gơrềng tú bơtàu tơnguh mhar ngan mơya kung gam gàr niam mờ bơtàu tơnguh bơta tờm ngan bơh jơi bơtiàn dê. Kwang atbồ lơgar Bulgaria ồng Rumen Radev kơ̆p kờñ 2 gah rơ̆p geh ală lơh broă bal ngan ngồn tàm ală gah sền gròi bal, pơgồp bơnah sơlơ tơnguh tai bơta gĭt gơ̆p lơh bơyô bal bơh yau mờ lơh broă bal đah 2 lơgar Việt Nam mờ Bulgaria mut lơh jrô ơnàng làm uă mờ geh cồng nha rlau tai.