Cau tĕ khà xã Ka Đơn, kơnhoàl Đơn Dương tơnggŏ bơta dồ nùs bal, pin dờn mờ jờng rơ ngan cồng nha lơh jăt broă lơh rơcăng lài kơryan sa kwề sa kwà, is ồn là jơh nùs lơh ngan uă ngan tàm lơh jăt tơrmù mpồl lơh broă bơh Đảng, Dà lơgar dê. Mờ cau tĕ khà kung dan mờ Mpồl cau ala măt Quôk hội càr Lâm Đồng uă broă ờ hềt dipal gơlik geh tàm tŭ lơh jăt Adăt Ù tiah, Adăt Mpồl lơh broă bal, broă ai apah, kă bro, lơh gơs giă ù gơ wèt mờ ală anih lơh broă bơ̆t bơtàu.

Jăt ồng Phan Đình Trạc, Kwang ătbồ Mpồl Broă cíñ trị dơlam lơgar Dà lơgar dê đơs, do là ală broă rềp mềl ngan mờ rài kis geh ngan, gơrềng tơn tus broă lơh lơh sa mờ rài kis làng bol dê, pal geh ală gah, ală kâp sền gròi bơsong. Tàm hơ̆, pin wil wơl bơta ờ niam tàm lơh sră pơ àr gơnoar ătbồ, lơh lơngah lơngañ làng bol in, kờñ pal geh lùp khàu lơh loh mờ lơh glài kràñ.