Xã Dơng K’Nơh, kơnhoàl Lạc Dương, càr Lâm Đồng geh rlau 90% khà kờp làng bol là làng bol jơi bơtiàn dồ ết nă cau. Bal mờ jơnau dan mờ Dà lơgar pal mhar lơh sir gùng lòt Trường Sơn Đông, gùng càr 722 lòt gan ù tiah do nàng lơh pràn tàm tơrbŏ bal kă bro phan, bơcri priă bơt bơtàu phan bơna ƀòn lơgar, ngan là ală gùng che ồs đèng 3 pha gàr niam drơng broă lơh sa mờ rài kis làng bol in, sơlơ tơnguh tai lơh sa- mpồl bơtiàn bơtàu tơnguh... Cau tĕ khà tiah do is ồn sề gròi tus broă lơh atbồ sền gàr brê mờ ală broă dong kờl dờp geh bơta kwơ tơn bơh brê dê nàng kờñ tơnguh uă priă lơh geh, bè ờs wơl rài kis.

Đơs tàm dơ̆ tìp mat mờ cau tĕ khà, Kwang atbồ Mpồl Broă cíñ trị dơlam lơgar Dà lơgar ồng Phan Đình Trạc đơs là, jơnau đơs bơh cau tĕ khà dê di pal ngan. Mpồl cau ala mat Quôk hội càr Lâm Đồng rơ̆p yal mờ ală anih lơh broă, mpồl lơh broă geh gơrềng sền sơ wì, bơsong, mơkung kơlôi sơnơng tai ală broă lơh nàng gàr niam broă lơh sa kơ̆ kơl jăp ai làng bol kis kơnờm tàm brê. Di tàm dơ̆ do, Mpồl cau ala mat Quôk hội càr Lâm Đồng neh jàu 20 bơnah phan pà ai ală hìu bơnhă geh sră dong kờl dà lơgar, hìu bơnhă rƀah mờ kal ke in.