Kờp bơh ngai 15 tus ngai 18/8, ală sàh Krông Pắc, Cư Mgar, Krông Năng mờ Drà Online tàm tiah Ràng tơlik phan bơna Drà gah phan sầu riêng càr Dăk Lăk neh bơyai lơh 8 dar livestream tăc phan. Ală dar livestream gơ hòi gơ jà rlau 2 tơlak dơ̆ cau sền.

Tàm hơ̆, ală dar livestream tăc sầu riêng tàm sàh Krông Năng lơh geh cồng nha ngan rlau jơh, tŭ tăc geh rlau 5 rơbô sră blơi phan, tăc bro rlau 24 tấn sầu riêng, priă lơh geh pơgăp 2 tơmàn 400 tơlak đong.

Bal mờ tăc sầu riêng tàm internet, ală dar livestream gam yal tơngĭt, yal uă 21 phan bơna OCOP bơh ală mpồl lơh sa kă bro, mpồl lơh broă bal  mờ hìu bơnhă lơh sa kă bro tàm ù tiah do dê.

Tus bal ală dar livestream ờ mìng geh KOL (Cau tiơng pơn rơ), KOC (Cau ngui sa tiơng pơn rơ) ờs mờng lơm mờ gam geh kwang bàng, công chức, đoàn viên ơruh pơnu, mpồl lơh sa kă bro mờ ală cau gĭt wă phan bơna ală tiah dê.

Broă lơh “Tơl sàh dùl KOL, KOC tăc sầu riêng online” lơh geh bơta pa tàm gơ hòi gơ jà kă bro phan tàm Dơ̆ lơh chờ Sầu riêng Dăk Lăk nam 2026, mơkung pờ ơnàng tŭ tơngai niam ai sầu riêng Dăk Lăk tus mờ cau ngui sa gùt lơgar mờ hời rơ hời gơ gơs mpồl kă bro phan điện tử tàm ƀòn lơgar tơn.