Tơnơ̆ rơlao 2 poh bơyai lơh tàm phan ngui pờ tơlik tàm internet (Web App) geh Mpồl bơyai lơh ai, dơ̆ pơrlòng neh hòi jà gal kwang bàng, cau tàm mpồl cau ùr mờ ală làng bol tàm càr Dăk Lăk tus bal, mờ rơlao 52 rơbô jơnau di mờ kơrnoăt geh ai. Bơta niam jơnau pơrlòng geh đơs niam ngan, uă cau pơrlòng geh điểm jơnhua ngan 200 điểm mờ tŭ jơ lơh jơh jơnau pơrlòng lơyah.

Mò Nguyễn Thị Hồng Thái, Chủ tịch Mpồl tam klac cau ùr càr Dăk Lăk, cau lam bồ Mpồl bơyai lơh dơ̆ pơrlòng pà git, dơ̆ pơrlòng geh git nền là dùl dơ̆ pơrjum chính trị làm uă, pơgồp bơnah ai ală tơngume tờm bơh ală Jơnau lơh nền tàm pơrjum tơngai lơh broă bơh nam 2025 tus nam 2030 dê tus rềp rlau mờ kwang bàng, cau tàm mpồl mờ làng bol. Tàm pơrjum, Mpồl tam klac cau ùr càr Dăk Lăk jàu 9 khà jờng mpồl bal, mwò 24 khà jờng nă să is.