Đơs tàm dơ̆ lơh broă, ồng Tô Lam, Tổng Bí thư, Chủ tịch lơgar sồr Đảng ủy, mpồl đơng lam mờ jơh gùt kwang bàng, cau ling tàm Sư đoàn bộ binh cơ giới 308 pal bơ̆t bơtàu Sư đoàn mùl màl pràn kơl dang bè chính trị, pal dờn song mờ Đảng, Dà lơgar mờ Làng bol.

Do là broă geh nùs nhơm pal jăt, là tơngu me tờm lơh geh bơta pràn tam dră bơh Ling klàng he dê. Den tàng, Sư đoàn pal sền kwơ broă bơto chính trị, đơng lam nùs nhơm, bơto bơtê bơhiàn jăk chài; lơh nàng kwang bàng, cau ling in wă nền nòn nùs nhơm, broă lơh, gùng dà broă lơh bơh Wa Hồ dê, pơnyờ să mờ bơhiàn ờs mờng, tơnguh kơnòl broă, sùm gàr kơl jăp nùs nhơm chính trị, geh nùs nhơm pin dờn uă ngan tàm broă đơng lam bơh Đảng dê, geh bồ tơngoh tam dră uă, tŭ lơi kung rơcang lài dờp mờ lơh gơs niam kơnòl broă geh jào tàm tơl broă lơh. Ồng Tô Lâm, Tổng Bí thư, Chủ tịch lơgar pin dờn, mờ bơhiàn “Lam lài, khin cha, tam klăc bal, lơh jăt nền nòn, sơbăc mhar, lơh ngan tam dră, jai pha”, mờ nùs nhơm pơnyờ să bơh mpồl Khin cha jăk chài Mpồl ling klàng phào crong làng bol dê, geh uă bơhiàn niam, kwang bàng, cau ling Sư đoàn bộ binh cơ giới 308 rơ̆p pơn jăt tai tam klăc bal, tam gơl pa, bơceh lơh, lơh geh pràn is, pràn ngan, sơrlèt mờ ală kal ke, lơh gơs jăk chài ală kơnòl broă.