Tàm bơta priă kes priă dà lơgar dê ờ hềt gơtùi ai nàng bơcri lơh gơl gùng rơndeh lòt mhar do, mơkung lơh jăt jơnau sồr mpồl bơtiàn lơh bal, Ƀộ Gùng lòt rê Jun pơndiang pơgồp bal bơh Anih duh broă Làng bol càr Tiền Giang yal mờ geh Phó Thủ tướng ai gơnoar jàu Ƀộ in kơlôi sơnơng bơcri priă lơh ơnàng gơl gùng rơndeh lòt mhar ƀòn dờng Hồ Chí Minh- Trung Lương- Mỹ Thuận jăt broă lơh PPP (bơcri priă jăt broă lơh lơh broă bal đah dà lơgar mờ làng bol) jơh gùt gơl gùng. Jăt mờ hơ̆, bơta jòng jơh gùt gơl gùng pơgăp 91 kơi sồ, bơta ơnàng bơcri lơh bơh 6 tus 8 bơnàng gùng rơndeh lòt, dipal mờ bơta ơnàng bơnàng gùng dê neh geh ai ù lơh gùng.

Pơndŭt dơ̆ pơrjum, Phó Thủ tướng ồng Trần Hồng Hà jàu Ƀộ Gùng lòt rê Jùn pơndiang yal wil tơl ală tŭ lam lơh Rơndăp broă lơh lơh ơnàng gơl gùng rơndeh lòt mhar ƀòn dờng Hồ Chí Minh- Trung Lương- Mỹ Thuận tơngai lài; sền swì, bơto pơlam ală tiah săc rwah cau bơcri priă jăt jơnau sồr pa bè bơcri priă dà lơgar bơh ngai 01/01/2025, broă rơndăp lơh jàu wơl jơtài lơh gơs bơh priă bơcri dà lơgar dê nàng lơh gơl gùng rơndeh lòt mhar.