Tàm gùng đơs crih nggồr, bơta àng gơcrà geh sùm tềng jơnang đơs crih geh bơkah mờ ală rùp phan kơphe bơkah ƀòn dờng tiah kơh bơnơm Pleiku dê, ală cau lơh broă tàm Kông ty TNHH BaKa (Pleiku, Gia Lai) yal phan geh lơh. Mò Nguyễn Thị Thanh, Phó Kwang atbồ kông ty pà git, broă lơh do neh bơyai lơh pah ngai tàm mờr 2 nam do. Do kung là broă lơh tờm dong kờl mpồl lơh sa kă bro yal mờ ai phan bơkah càr Gia Lai tus mờ cau ngui sa tàm gùt lơgar. Mìng tàm tơngai ờ jŏ, hìu tăc phan bơh mpồl lơh sa kă bro neh geh git nđờ rơhiang nă cau sền, geh rơlao 4,2 sơrmañ. Mò Nguyễn Thị Thanh pà git, bal mờ broă pờ ơnàng drà kă bro, mpồl lơh sa kă bro kung lơh geh uă ngan broă lơh sa, tơnguh uă bơta niam phan geh lơh, lơh niam kơl dung mờ sền kwơ broă lơh drơng ala tơnơ̆ mờ tŭ tăc phan. Mò Nguyễn Thị Thanh pà git: “Pah mang, bol añ geh bàr bơyô livestream bơh 7 jơ tus 10 jơ mang. Pah dơ̆ pờ ndrờm geh rơcang nền nòn bè bơta àng, micro, jơnau đơs. Broă kă bro điện tử gŏ he lơh broă nền nòn, geh dong kờl mờ ală voucher ờ sa priă pơn diang nàng cau blơi phan in tàm tŭ gam sền nàng blơi. Tŭ do, ală hìu ràng phan bơh BaKa tàm drà kă bro phan điện tử geh bơh 4,5 tus 4,9 sơrmañ. Bol añ pin là lơh broă nền nòn geh cồng nha niam”.

Bal mờ kơphe, tŭ do geh uă ngan bơta phan bơkah tàm càr Gia Lai bè dà lơwe, tiêu, gar điều geh tăc tàm drà kă bro điện tử, mờ khà priă geh gơguh sùm rơlao 8% pah nam. Tàm broă tam gơl sồ, càr Gia Lai neh dong kờl mpồl lơh sa kă bro lơh 255 website kă bro phan điện tử nàng đal git măt phan kă bro, jòi anih lơh gơs mờ kă bro tàm tơngu me sồ. Bơdìh hơ̆ tai, rơlao 90 tài khoản tăc phan tàm internet neh geh lơh ai 30 mpồl lơh sa kă bro geh bơngă pin dờn in. Ồng Phan Thanh Thiên, Phó Củ tịc Mpồl cau lơh broă sa kơnòm să càr Gia Lai yal: “Do là gah tăc phan niam ai càr mờ tàm tiah Tây Nguyên in. Mpồl rơ̆p dong kờl ală cau tàm mpồl càr Gia Lai pah nhai jà ală KOL, KOC, tiktoker nàng tăc phan, dong kờl mpồl lơh sa kă bro tơnguh pràn priă geh”.

Ală nam do, gah lơh sa mờ măi mok mờ kă bro phan càr Gia Lai neh bơyai lơh uă dơ̆ pơrjum, bơsram tàp nàng tơnguh uă jơnau git mờ wă ai ală mpồl lơh sa kă bro, mpồl lơh broă bal mờ làng bol tàm broă ngui broă kă bro phan tàm điện tử. Pa do, Sở Lơh sa măi mok mờ kă bro phan càr Gia Lai pơgồp bal mờ Mpồl Tam klăc Cau lơh sa kă bro kơnòm să càr Gia Lai bal mờ dùl drà kă bro phan tàm điện tử bơyai lơh bàr dơ̆ tăc phan tàm megalive (dơ̆ tăc phan pờ tơlik tàm internet geh lơh dờng). Pal kah ngan, tàm ală dơ̆ tăc phan do, Kwang atbồ Sở Lơh sa măi mok mờ kă bro phan neh lơh broă bal mờ cau blơi bal mờ ala măt gah lơh phan kă bro. Cồng nha geh 12 rơbô 700 dơ̆ tăc geh tăc mờ kờp jơh priă geh 1 tơmàn 800 tơlăk đong. Bŭ lah bè hơ̆, jăt ồng Phạm Văn Binh, Kwang atbồ Sở Lơh sa măi mok mờ kă bro phan càr Gai Lai pà git, kă bro phan tàm điện tử tàm càr dê kung gam tàm tơngai sơn đờm.

Tŭ do mìng rơ̆p geh 40% tàm khà 5 rơbô mpồl lơh sa kă bro tàm càr dê geh website kă bro phan tàm điện tử. Mơya cồng nha ală dơ̆ tăc phan pờ tơlik tàm internet pa do pà gŏ, phan geh lơh bơh broă lơh sa suơn sre càr Gia Lai dê geh bơta pràn ai geh priă uă tàm ală drà kă bro phan tàm điện tử: “Bàr dơ̆ pờ livestream pa do pà gŏ broă sền gròi uă ngan bơh cau blơi phan dê. Bơta do neh ai gŏ là gah kă bro phan tàm điện tử, bŭ lah pa ngan, kung gam geh bơta pràn uă tàm càr Gia Lai. Bol añ rơ̆p pơgồp bal mờ TikTok mờ Shopee nàng lơh ală ngai tăc phan, poh tăc phan megalive jăt tơngu me is bè phan geh lơh bơh broă lơh sa suơn sre bơkah càr Gia Lai dê. Tŭ do, Sở Lơh sa măi mok mờ Kă bro phan càr gam ai geh jơnau dan nàng bol mờ Ƀộ Lơh sa măi mok mờ Kă bro phan lơh geh anih dong kờl ka bro phan tàm điện tử, gơs anih tơrbŏ bal mpồl lơh sa kă bro tàm càr Gia Lai dê”.

Kă bro phan tàm điện tử gam gơs anih tơrbŏ bal kwơ màng, ai phan geh lơh bơh broă lơh sa suơn sre càr Gia Lai brồ să bơh drà kă bro tàm dơlam is càr tus mờ broă tăc tus tàm gùt plai ù. Kơnờm mờ broă lơh ndrờm bal mờ ngui bơta kwơ bơh kă bro phan tàm điện tử mờ sơlơ̆u wơl, ală jơnau đơs wơl bơh cau blơi phan kung neh pơgồp bal tàm broă dong kờl mpồl lơh sa kă bro bal mờ làng bol lơh broă sa ngai sơlơ sền gròi rơlao tus mờ phan geh lơh bơh să tờm dê. Do là broă sơn đờm geh uă bơta niam ai dùl gah lơh sa suơn sre pa mờ kơ̆ kơl jăp tàm càr Gia Lai dê.