Ală ƀộ tus bal dơ̆ pơrjum geh: Ƀộ Ling klàng, Ƀộ Cribơyai broă mờ lơgar ndai, Ƀộ Yal tơnggĭt mờ Mblàng yal jơnau mờ 08 tiah, geh: Hà Nội, ƀòn dờng Hồ Chí Minh, Hải Phòng, Đà Nẵng, Cần Thơ, Quảng Ninh, Hải Dương, Tây Ninh. Jăt jơnau yal bơh 03 ƀộ, 08 tiah dê, tơngai do broă lơh jăt, bơsong sră nggal gơnoar ătbồ dê, ai pà drơng broă dà lơgar, ală ƀộ, ală tiah neh geh uă lơh ngan mờ geh bàr pe cồng nha pơnrơ.

Đơs tàm dơ̆ lơh broă, Phó Thủ tướng Duh broă sùm Cíñ phủ ồng Nguyễn Hoà Bình đơs sùm do là dùl tàm ală kơnòl broă tờm, broă lơh tờm ngan lơh gơlik bơta gơn kơnờm bơtàu tơngguh wơl mờ ai tơl bơta gơguh tai lơh sa in, lơh niam wơl tiah bơcri priă kă bro. Mơkung đơs loh, jơnau kờñ pơnđơl lơh geh rài sră pơ àr gơnoar ătbồ niam bơnĕ ƀươn soh, tài làng bol drơng broă, do kung là jơnau sồr kràñ cê jơh nùs bơh Đảng, Dà lơgar he dê. Broă đal gŏ geh ală bơta gơkòl, bơta gam rơ̆p bơsong geh ală bơta ờ pràn jak, lơh geh bơta ƀươn ai làng bol, mpồl lơh sa kă bro in tŭ lơh ală sră pơ àr gơnoar ătbồ.