Broă rơndăp lơh kơlôi sơnơng, sồr rơndăp tăp sèng ală anih lơh broă gơ wèt ală mpồl Đảng, Cíñ phủ, Quôk hội neh ngan ngồn geh Kwang ătbồ Mpồl Rơndăp broă Dà lơgar ồng Lê Minh Hưng sền tàm Pơrjum ngai 01/12 tềng đăp rlau 1 tơlak 300 rbô nă đảng viên tàm jơh gùt lơgar. Kwang ătbồ Mpồl Rơndăp broă Dà lơgar ồng Lê Minh Hưng neh sền ală broă rơndăp lơh loh làng nàng kờñ rơndăp tăp sèng wơl, tơrmù ală anih lơh broă Đảng, Cíñ phủ, Quôk hội, Mặt trận Dà lơgar, ală mpồl cíñ trị- mpồl bơtiàn, ală mpồl làng bol bơh Đảng, Dà lơgar dê jàu kơnòl...jăt gùng dà dồ anih lơh broă lơh uă broă, dồ broă mìng jàu dồ anih lơh broă in ătbồ mờ kong kơnòl tờm, bơsong jơh jơnau tàm rơndăp tàm rơndồl bè gơnoar broă, kơnòl broă, tam cah bè ù tiah ƀòn lơgar, gah broă. Ală anih lơh broă, mpồl lơh broă lài do neh rơndăp tăp sèng bơh chờm kung pal kờp sền nền wơl sồr wơl, kràñ cê kơ̆ dơn sang jơh ală mpồl lơh kòn gùng. Jăt broă rơndăp lơh rơndăp tăp sèng, tơmŭt bal geh Kwang ătbồ Mpồl Rơndăp broă dà lơgar dê yal rơ̆p tơrmù geh êt ngan geh 4 anih lơh broă Đảng gơ wèt Dà lơgar, tơrmù 5 ƀộ, 2 anih lơh broă gơ wèt Cíñ phủ, tơrmù 4 anih duh broă Quôk hội mờ 1 anih lơh broă gơ wèt Anih duh broă Lơh kơnòl broă sùm Quôk hội…

Bè broă lơh sa- mpồl bơtiàn, Thủ tướng ồng Phạm Minh Chính pà gĭt, broă lơh sa- mpồl bơtiàn 11 nhai do lơh geh uă cồng nha kwơmàng, niam rlau pơndrờm bal mờ dồ tŭ tàm jơh ală broă. Digơlan jơh ală 15 broă jàu tờm lơh geh mờ sơrlèt broă jàu. Gơguh gùt nam kờp dŭ rlau 7%. Cíñ phủ gĭt nền nam 2025 là nam tơngguh pràn lơh jơh broă jàu, pơnđơl lơh geh cồng nha jơnhoa ngan rlau jơh ală jơnau kờñ, broă jàu bơh broă rơndăp lơh 05 nam, bơh nam 2021- 2025 dê.

Đơs sồr lơh tàm pơrjum, Tổng Ƀí thư ồng Tô Lâm đơs là, nàng lơh geh jơnau kờñ bơtàu tơngguh lơh sa- mpồl bơtiàn mờ Jơnau lơh nền tàm pơrjum bơh Pơrjum dờng dơ̆ XIII dê neh sồr, bol he pal tam gơl pa bơta kơlôi sơnơng, pal lơh nền, pal tam gơl pràn, pal sơrlèt is să tờm; sồr ală kâp, ală gah bơh Dà lơgar tus ƀòn lơgar pal gĭt nền lơh ngan jơh nùs cíñ trị uă ngan rlau jơh tàm lơh jăt gùng dà jơnau sồr do; kwang bàng đơng lam bồ, cau lam bồ kâp ủy, anih lơh broă pal lơh krơh, rơcăng lài, kràñ cê jơh nùs tàm lơh jăt kơnòl broă geh jàu. Pal pơn jăt tai lơh gơlik bơta tam gơl pràn rlau tai bè gùng dà broă lơh adăt boh lam, tă bơsong jơh ală kal ke, gơkòl, anih kơryan nàng ai niam tơl priă jền mờ lơh tam gơl pa wơl sră pơ àr gơnoar ătbồ pràn kơldang, bơceh lơh tiah ƀươn ƀoài nàng bơtàu tơngguh.