Kông ty pơgồp bal Lòs Hòa Phát Dung Quất là dùl tàm ală mpồl lơh sa kă bro dờng, ngui uă cau lơh broă mờ tă pơgồp kwơ màng tàm gơguh tai lơh sa mờ măi mok bơh càr Quảng Ngãi dê. Tŭ do Kông ty geh 3 rơndăp broă lơh gam lơh broă tàm ù tiah càr Quảng Ngãi, geh: Tiah lơh bal lơh gơlik lòs rbă, lòs Hòa Phát Dung Quất 1; Tiah lơh bal lơh gơlik lòs rbă, lòs Hòa Phát Dung Quất 2; Rơndăp broă lơh Anih ơhò ơm tơrgùm bal container Hòa Phát Dung Quất gam hời rơ hời lơh sir.

Ồng Hoàng Ngọc Phượng, Phó lam bồ Kông ty pơgồp bal Lòs Hòa Phát Dung Quất pà gĭt, qúy I nam do, khà lòs bơt bơtàu bơh mpồl lơh broă dê lơh gơlik geh 692 rơbô tấn. Mpồl lơh sa kă bro gam pơn jat tai tơnguh khà lơh gơlik tàm qúy II, pơgồp bơnah sơlơ tơnguh tai gơguh tai lơh sa mờ măi mok bơh càr dê:

“Mpồl lơh broă sền gròi tơrgùm lơh sa kă bro ngăc ngar mờ sơlơ tơnguh tai atbồ priă tă lơh; sền gròi bơcri priă blơi măi mok, phan bơna, ngui jak chài, măi mok, tam gơl sồ, tơnguh uă cồng nha phan bơna dê, wèt tus ală mpồl phan bơna pa, phan bơna tơlir, rềp mềr mờ tiah ơm kis mờ lơh geh jơnau sồr dờp ală lơgar dê. Kông ty kung ngăc ngar tàm broă lơh gơlik, tăc phan mờ lơgar ndai, lơh pràn broă lơh lơh sa pơgồp bal mờ bơt bơtàu mat kă bro phan bơna dê”.

Quý I nam 2026, gơguh tai GRDP càr Quảng Ngãi dê lơh geh 8,24%. Tiah lơh sa mờ măi mok pơn jat tai gàr gơnoar broă “lam lài”, tă pơgồp dùl nggùl khà gơguh bal; gah lơh gơlik phan, mòn lơh phan gàr sùm khà gơguh tai 2 nơm khà. Tiah drơng broă kung bơtàu tơnguh wơl loh làng, kờp jơh priă tăc rah rài phan bơna mờ priă lơh geh drơng broă gơguh rlau 15%; lòt nhơl bơtàu tơnguh niam; tăc phan mờ lơgar ndai gàr tàm khà 2 nơm khà. Do là ală tềl tơngŏ niam ngan, lơh geh tơngume nàng càr in pơn jat tai lam lơh ală broă lơh bơtàu tơnguh mhar tàm tơngai tus.

Bulah bè hơ̆, sơñio khà gơguh tai lơh sa ờ hềt ring bal. Bàr pe gah broă bè tơnhào phan kwơ tàm ù, kơtau khŏ gơmù; rề priă dia gơmù pơndrờm dùl tŭ bal mờ nam lài. Pal sền gròi là, ai priă  dà lơgar gam lơyài, pa lơh geh rlau 7% broă rơndăp lơh, là tiah gơ kòl dờng ngan rlau jơh kờñ pal tă bơsong.

Tàm tiah broă lơh sa suơn sre, phan brê, phan tàm dà mìng gơguh pơgăp 3% tài priă tă lơh bơh sơn rờp gơguh uă bơh nhai 3, gơ dŭi bal giă phan bơna, jun pơndiang gơguh, làng bol tơrmù priă bơcri lơh sa. Gah phan brê gơtìp gơrềng tài bơh dơ̆ ơm rlô sa tềp jŏ jòng; jòi kŭp phan tàm dà gơtìp kal ke tài bơh ñiên liệu gơguh. Tàm tiah lơh sa mờ măi mok- bơt bơtàu, lơh sa mờ măi mok gơguh 12,76%, uă ngan kơnờm ală phan bơna tờm bè zờu mờ lòs. Ồng Võ Thành Nhân, Lam bồ Tơrgùm kờp càr Quảng Ngãi đơs là:

“Bơt bơtàu tŭ do geh tus 4,9% tàm rơndăp tăp sèng lơh sa; Bơt bơtàu gơmù 8,8% neh gơ dŭi bal khà gơguh GRDP gùt càr dê gơmù. Bè hơ̆, bulah geh tơrgùm bal bơnah rơhiang ờ dờng, mơya khà gơmù bơh gah do dê kung gam gơrềng uă ngan tus gơguh tai bal”.

Bơcri priă dà lơgar pơn jat tai geh sền gĭt là bơta gơn kơnờm kwơ màng sơlơ tơnguh tai gơguh tai nam 2026. Mơya, tŭ tơngai ai priă bơcri gam lơyah, tus lồi qúy I pa mìng lơh geh pơgăp 7,2% broă rơndăp lơh dê lơm. Càr Quảng Ngãi gam kràñ cê jơh nùs đơng lam tă bơsong ală bơta kòl yan nàng kờñ lơh mhar tŭ tơngai ai priă bơcri lơh.

Jat ồng Nguyễn Công Hoàng, Phó Củ tịc Anih duh broă Làng bol càr Quảng Ngãi, tŭ tơngai ai priă bơcri dà lơgar bơh càr dê gam lơyài tài bơh uă jơnau gơbàn. Tàm kấp sàh, uă tiah ờ hềt rcang lài tàm lam lơh jat, rơwah rơndăp broă lơh pa ala tài bơh ngui broă lơh bơt bơtàu neh sră nggal, gơ lam tus lơyài ai priă bơcri. Tàm kấp càr, kòl yan uă ngan kung gam là broă lơh tơm priă, ai mat ù, sền gĭt giă ù mờ nùs nhơm rngòt mờ rơngòt lơh tìs. Ồng Nguyễn Công Hoàng sồr ală gah broă, ală sàh kràñ cê jơh nùs tă bơsong ală bơta gơ kòl, ngan là tàm gah ù tiah mờ đơng lam priă bơcri, nàng kờñ lơh mhar tŭ tơngai mut lơh ală rơndăp broă lơh dê:

“Gơwèt mờ broă lơh đơng lam priă jền, sồr Sờh Priă jền càr Quảng Ngãi rcang lài, ngăc ngar tàm tam pà mờ đơng lam priă bơcri. Ngan ngồn gam geh bơta geh ngan geh broă lơh bơt bơtàu geh mpồl broă mơya ờ tơl priă bơcri nàng ai priă bơcri lơh, tàm tŭ bàr pe priă bơcri den ờ hềt ngui. Broă đơng lam kờñ pal geh kờp sền bal, is ồn tàm tơngai priă lơh geh bơh priă ngui ù ờ hềt lơh geh mờ broă rơndăp lơh. Mơkung pal gròi sền niam broă ngui priă gơguh tai, pleh tơrgùm uă bơta kơ̆p gơn tàm dùl bơta ờ ngan ngồn, digơlan hoàc huơr roh bơta tàm pơn ring kes priă dê”.