Tàm dơ̆ lòt còp ngan ngồn lơgar Kộng hoà Italia, ngai 14/4, tàm càr lơgar Roma, Củ tịc Quôk hội ồng Trần Thanh Mẫn mờ Mpồl kwang bàng ala mat kấp dờng lơgar Việt Nam geh dơ̆ tơm bơh bơr mờ kwang bàng, cau lơh broă anih lơh broă ala mat lơgar Việt Nam mờ mpồl bơtiàn cau Việt Nam tàm Italia.

Củ tịc Quôk hội neh yal mờ mpồl bơtiàn cau Việt Nam tàm Italia in bè ală bơta tàm lơgar mờ ală tềl lời wơl kwơ màng bè bơyai lơh geh cồng nha Pơrjum dờng Đảng gùt lơgar dơ̆ 14, dơ̆ tĕ khà cau ala mat Quôk hội khoă 16 mờ cau ala mat Mpồl duh broă Làng bol ală kấp tơngai lơh broă bơh nam 2026- 2031. Củ tịc Quôk hội kơ̆p kờñ là, mpồl bơtiàn cau Việt Nam là dùl mpồl tam klăc ring bal tàm lơgar Italia, tơngai pa do neh tam klăc bal rao, tus do tam klăc bal niam rlau tai, nàng kờñ dong kờl ală kơnòm bơsram lơgar Việt Nam bơsram sră tàm lơgar Italia nàng tơnơ̆ do dà lơgar Việt Nam geh mpồl cau lơh broă jak. Củ tịc Quôk hội kung kơ̆p kờñ mpồl cau Việt Nam tàm Italia sền gàr niam chài, bơhiàn ờs mờng bơh jơi bơtiàn dê, dà Yoan tàm lơgar he ơm kis; is ồn là lơh jat niam adat boh lam tiah he dê ơm kis.