Tổng Ƀí thư, Củ tịc lơgar ồng Tô Lâm đơs nền Việt Nam kơ̆p kờñ bơh dơ̆ lòt còp dơ̆ do, pơn jat tai lơh jrô ơnàng rlau tai bơta pin dờn cíñ trị, lơh geh gơnoar broă pa bơh lơh broă bal đah 2 gah mờ tàm tơrbŏ bal tơl làm, jrô ơnàng làm uă rlau tai, bal mờ gơ̆p lơh ngan ngồn jơnau kờñ bơtàu tơnguh bơh tơl lơgar dê. Tổng Ƀí thư, Củ tịc lơgar sồr 2 gah gàr niam sùm dơ̆ tìp mat kwang bàng kấp dờng, lơh kơ̆ kơl jap bơta pin dờn cíñ trị, tơnguh uă cồng nha lơh broă bal tàm ală gah Đảng, Dà lơgar, Cíñ phủ, Quôk hội- Cau ala mat làng bol, Mặt trận- Anih duh broă Mặt trận dà lơgar Lo lơh kơ̆ kơl jăp rlau tai bơta tờm lơh broă bal sền gàr dà lơgar- lơngăp lơngai.

Củ tịc Anih duh broă Mặt trận Dà lơgar Lo ồng Vương Hộ Ninh đơs nền Lo sùm sền bơta gĭt gơ̆p mờ lơgar Việt Nam mờ gùng dà broă lơh ai lơh lài tàm broă cribơyai broă mờ lơgar ndai lơgar rềp bal dê; jờng rơ uă ngan ală cồng nha lơh geh tam gơl pa jơnau tàm pơ àr bơh lơgar Việt Nam dê, sùm kờñ Việt Nam bơt bơtàu geh cồng nha Củ nghĩa sàh hội di pal mờ broă Dà lơgar dê. Ồng Vương Hộ Ninh sồr 2 gah gĭt loh gùng dà broă lơh bơtàu tơnguh bơta gĭt gơ̆p đah 2 gah, sơlơ tơnguh tai broă lơh tam gơl pa sàh hội củ nghĩa tàm tơl lơgar dê.