Jat hơ̆, anih lơh broă geh gơnoar rề ơnàng bă ù sền sơ wì gơguh tus 10 sàh nàng sac rơ wah êt ngan là bơh 4 sàh geh tơl bơta nàng tơng gơs sơnah ƀòn tàm nam 2027. Tŭ do, Khánh Hòa neh lơh geh 4 tàm 7 jơnau sồr, geh khà kờp làng bol, bă ù, khà tiah drà mờ gơnoar broă, bơta kuơ. Nàng lơh gơs jơnau kờñ tàm nam 2028, càr kờñ pal pơn jat tai gàr sùm ală jơnau sồr neh lơh geh mờ lơh sir 3 jơnau sồr gam wơl tàm nam 2027. Đơng lam Anih duh broă Làng bol càr Khánh Hòa sồr ală sàh rơcang lài yal mat broă lơh kuơmàng, rơndap ai priă bơcri, lơh gơlik bơnàng jă lơh sir sră nggal, wèt tus jơnau kờñ gơ gơs ƀòn dờng gơ wèt Dà lơgar tàm nam 2028.