Bàr Tổng Ƀí thư, Củ tịc lơgar neh bal mờ gơp ai tơnggŏ bơta chờ hờp tềng đap ală bơta bơtàu tơnguh niam bơnĕ bơh git gơp 2 Đảng, 2 lơgar dê tàm tơngai lài, pơn rơ ngan là cribơyai broă rơndap lơh kwang bàng kâp dờng geh lơh đềt mềr, ală mpồl lơh broă bal ngai sơlơ tơl làm, li la, pin dờn; lơh broă bal lơngap lơngai – sền gàr dà lơgar tam gơl bơh tìp mat lơh kwèng gơ gơs lơh broă bal ngan ngồn rlau; lơh broă bal lơh sa – kă bro phan, bơcri priă, tàm tơrbŏ bal gùng lòt geh uă tam gơl pa; lơh broă bal càr, ƀòn dờng, tìp mat lơh kwèng làng bol duh hồl; pơgồp bal uă gah ngai sơlơ nền nòn. Bàr nă Kwang đơng lam bồ đơs nền, tàm tŭ tơngai kal ke bơh ală broă tàm ală lơgar dê, 2 Đảng, 2 lơgar kờñ pal tam klac bal jơh nùs, sơlơ tơnguh bơta pin dờn kuơmàng, tàm tơrbŏ bal gùng dà broă lơh, kă bro phan, phan bơna, năng lượng, pơn jat tai lơh niam, tơnguh gơnoar broă rlau bơta git gơp đah Việt Nam mờ Lo tàm tŭ tơngai pa, tă pơgồp ngan ngồn ai ring lơngai, lơh broă bal mờ bơtàu tơnguh bơh tiah do mờ tàm dunia.

Bè gùng dà bơtàu tơnguh bơta git gơp 2 Đảng, 2 lơgar tàm tơngai tus, 2 nă Kwang đơng lam bồ đơs nền rơp pơn jat tai sồr ală kâp, ală gah broă lơh lơh jat jơnau kờñ bal “06 rlau”, gàr sùm tìp mat kâp dờng, git gŏ geh cồng nha gơnoar broă ai tơlik lài gùng dà kuơmàng bơh gah Đảng dê, sơlơ lơh broă bal ngan ngồn tàm ală broă, gàr kơ̆ bơnàng jă mpồl bơtiàn ai git gơp 2 gah in; pơgồp bal jơh nùs tàm ală mpồl lơh broă uă lơgar, gròi sền mờ bơsong niam rlau ală bơta gam ờ niam, ờ ring bal.

Tàm pơrjum bơyai, bàr nă Kwang đơng lam bồ ngan ngồn yal bơr sơn đờm lam lơh “Nam lơh broă bal lòt nhơl Việt Nam – Lo 2026 mờ 2027”, ring bal lơh pràn ală broă lơh bal, yal tơnggit hòi jà lòt nhơl, lơh broă bal lơh niam phan bơna, broă drơng ala lòt nhơl, gàr kơ̆ mờ gàr sùm gơnoar broă là drà nac lòt nhơl dờng ngan rlau jơh bơh gơp dê.