Tàm dar pơrjum, ală jơnau đơs tă pơgồp sồr srơh tàm pơrlòng tơrgùm lơh tus geh kơnòl broă bơtàu tơnguh lơh sa- mpồl bơtiàn pah nam mờ Broă rơndăp lơh 5 nam (2026 - 2030) jat Jơnau lơh nền tàm Pơrjum dờng cau ala mat gùt lơgar dơ̆ XIV Đảng dê, broă lơh bơh Quôk hội, Cíñ phủ; Tàm pơrlòng lơh sir, lơh sir sơr lèt ală broă lơh bơtàu tơnguh bơt bơtàu, lơh sa kơnhoàl ù tiah, lơh sa dà lềng... Jat hơ̆, ală broă jàu tàm pơrlòng tus nam 2030, geh: Khà gơguh tai kờp jơh phan bơna lơh geh tàm lơgar kờp bal ai tơngai bơh nam 2026 - 2030 bơh 10% dùl nam rlau hơ đang; GDP kờp bal tơl nă cau tus nam 2030 lơh geh pơgăp 8 rơbô 500 dolar Mỹ.

Đơs pơndŭt dar pơrjum, Thủ tướng ồng Lê Minh Hưng ring bal mờ ală jơnau đơs mờ đơs là broă lam lơh srơh tàm pơrlòng pal pơgồp bal mờ nùs nhơm đơng lam, nùs nhơm, jơnau kờñ Jơnau lơh nền tàm pơrjum bơh Pơrjum dờng Đảng gùt lơgar dơ̆ XIV dê ai tơlik, hơ̆ là broă jàu gơguh tai 2 nơm khà, mơya pal kơnhăp kơ̆ mờ pơgồp bal mờ bơtàu tơnguh rài kis làng bol dê; broă lơh pà khà jờng pal di, gơ kờn mờ di tŭ. Thủ tướng Cíñ phủ sồr jơh ală gah broă, ală kấp pal pơn đơl pràn lơh ngan, lơh sir jak ngan kơnòl broă; pal ai cồng nha lơh bơta đo was.