Đơs tàm broă lơh, Tổng Ƀí thư, Củ tịc lơgar Lo ồng Tập Cận Bình yal pơgăp mờ do 1 nam bal mờ Tổng Ƀí thư, Củ tịc lơgar Việt Nam ồng Tô Lâm yal bơr sơnđờm lơh Gùng lòt pơrhê kơlôi sơnơng, bơsram, tus tŭ do ơruh pơnu 2 lơgar neh geh uă sền gŏ lùp bơsram bal mờ gơ̆p, tàm dong tàm kờñ bal. Ồng kơ̆p kờñ, mờ bơta jơh nùs jơh tồr mờ pràn kơnòm să, ơruh pơnu 2 lơgar pơn jăt tai tam klăc, àñ ơnòng kơnòl geh uă tă pơgồp rlau tai tàm ală broă 2 lơgar Lo mờ Việt Nam sơm băt tê bal lòt tàm gùng lòt lơh tam gơl pa, bal mờ gơ̆p lơh wơl ală srơh pràn kơldang bè tam gơl pa bơceh lơh, pờ mpồng lơh broă bal mờ geh cồng nha bal. Bè đah he, Tổng Ƀí thư, Củ tịc lơgar Việt Nam ồng Tô Lâm đơs là, ơruh pơnu, rơnàng kơnòm să 2 lơgar ndrờm gơtùi lơh hừh nùs mờ sền dờng màng bơta gĭt gơ̆p “là cau dùl bơta kơ̆p kờñ bal, mờ là oh mi” đah bàr Đảng mờ Làng bol bàr lơgar Việt Nam mờ Lo bơh Củ tịc Hồ Chí Minh mờ Củ tịc ồng Mao Trạch Đông bal mờ ală rơnàng cau kăc màng bàr lơgar dê roh uă dà kơlhề bơ̆t bơtàu. Ồng kơ̆p kờñ rơnàng kơnòm să bàr lơgar bơ̆t bơtàu tĕ bơta kơ̆ nùs cíñ trị kơ̆ kơl jăp, jơnau kơ̆p kờñ kis dipal; sơlơ lùp bơsram tai, lơh jăt niam nùs nhơm tam gơl pa bơceh lơh, lơh tờm jak chài – măy mŏk, yờ tơngguh nùs nhơm lam lơh dong kờl is, tă pơgồp dipal ai bơta bơtàu tơngguh bơh tơl lơgar dê mờ gĭt gơ̆p lơh bơyô bàr lơgar Việt Nam mờ Lo.

Kung tàm klo ngai 15/4, Tổng Ƀí thư, Củ tịc lơgar Việt Nam ồng Tô Lâm mờ Tổng Ƀí thư, Củ tịc lơgar Lo ồng Tập Cận Bình neh sền gŏ bal Dơ̆ kĭ ală sră nggal lơh broă bal pơnrơ ngan đah ală ƀộ, gah, ƀòn lơgar bàr lơgar dê.