Tàm dơ̆ wă, Thủ tướng đơs nền, bơta git gơ̆p đah lơgar Việt Nam mờ lơgar Nga, đah Đảng Kộng sản lơgar Việt Nam mờ Đảng Kộng sản lơgar Nga sơlơ đềt mềr, kơl jăp. Thủ tướng ồng Phạm Minh Chính đơs là, tàm bơta pa, 2 lơgar pal lơh broă bal, ai geh bơta pràn, cri bơyai tơnguh nùs nhơm pin dờn mờ wă bal; iăt bal mờ nùs nhơm dờn song, tam pà bal mờ plai nùs tờm mờ lơh broă mờ bơta phan mùl màl.

Đơs bè tơngai tus do dê, lơgar Việt Nam ai geh jơnau kờñ gơguh lơh sa 2 sồ, Thủ tướng đơs là, lơgar Việt Nam ai bơta pràn tàm dơlam là kòn bơnus, ù tiah geh is, bơta niam chài là kwơ màng, jŏ jòng, lơh geh; bơta pràn bơh bơdìh là măi mok, năng lượng, atbồ broă lơh là geh sùm, geh nùs nhơm lơh pràn. Gơwèt mờ bơta prànbơh bơdìh, Thủ tướng đơs nền lơgar Việt Nam ờ gơtùi ờ geh broă dong kờl bơh lơgar Nga dê, tàm hơ̆ uă ngan là broă năng lượng, nhơm jờu, ală bơta gơrềng tus mờ lơngăp lơngai dà lơgar, niam chài.