Rơndăp broă lơh bơ̆t bơtàu Ƀlàng rơndeh par ală lơgar Long Thành geh priă bơcri kờp jơh 22 rbô 856 tơmàn đong. Mờ bơta sồr lơh kràñ cê jơh nùs bơh Thủ tướng Cíñ phủ dê, bơta tus lơh bal jơh nùs bơh ală ƀộ, gah, ală tiah, ală anih lơh broă geh gơrềng dê mờ bơta rơcăng lài, kràñ cê jơh nùs bơh Kông ty dờng Ƀlàng rơndeh par Việt Nam (ACV) dê, ngan là lơh jăt jơnau sồr bơh Thủ tướng Cíñ phủ dê gĭt nền loh “nam 2024 là nam tơngguh pràn, nam 2025 là nam tam gơl pràn”, tŭ tơngai lam lơh rơndăp broă lơh lơh geh uă cồng nha niam ngan.

Thủ tướng sồr lam lơh dơ̆ tàm pơrlòng uă 450 ngai mang tàm tiah lơh broă, ai rơndăp broă lơh geh lơh sir tàm ngai 31/12/2025. Thủ tướng sồr ală mpồl lơh broă bơ̆t bơtàu Ƀlàng rơndeh par ală lơgar Long Thành mờ gùng rơndeh lòt mhar Biên Hoà- Vũng Tàu tơngguh tơngai lơh, lơh mhar tŭ tơngai lơh rlau tai nàng lơh bơsir wơl tŭ tơngai neh lơyài lài do.