Rơndăp broă lơh Ƀlàng rơndeh par Ală lơgar Long Thành là rơndăp broă lơh ƀlàng rơndeh par dờng ngan gùt lơgar dê bơh lài tus tŭ do. Tŭ do broă lơh bơh ală gah broă tờm gam geh Kông ty dờng Ƀlàng rơndeh par Việt Nam lơh mhar di jăt mờ jơnau sồr bơh Cíñ phủ dê nàng di mờ jơnau kờñ ai ngui lài mờ ngai 02 nhai 09 nam 2026.

Do là dơ̆ 05, Thủ tướng ồng Phạm Minh Chính lòt sền broă lơh ƀlàng rơndeh par ală lơgar Long Thành. Tàm tiah lơh ƀlàng rơndeh par, Thủ tướng neh lòt sền broă lơh ală broă, rơndăp broă bơnah broă. Jơnau kờñ lồi nam 2025 jơh ală rơndăp broă pal gơs mờ lồi nhai 02 nam 2026 pal geh ai ngui ƀlàng rơndeh par. Thủ tướng sồr broă lơh ƀlàng rơndeh par pal di tơngai, kơl jăp, niam, lơngăp lơngai lơh broă, pal “bañ ngòt trồ tơngai duh, trồ mìu, bañ ngòt mìu càl rơbŭt dờng”, “sa mhar, bic mhar”, lơh broă sùm tàm ală ngai satềp nàng lơh di jăt jơnau neh geh ai.