Nam do, Tập đoàn Nhơm zờu Việt Nam (Petrovietnam) neh lơh sir tơl làm broă rơndăp lơh nam mờ priă lơh geh 1 tơlak tơmàn đông, tong kes priă dà lơgar 164 rơbô tơmàn đong. Petrovietnam neh lam lơh ală rơndăp broă lơh tờm geh lơh dờng ngan, măi mok pa bè ală rơndăp broă nhơm- đèng Lô B - Ô Môn mờ rơndăp broă lơh Lạc Đà Vàng.

Đơs tàm ală broă lơh, Thủ tướng ồng Phạm Minh Chính gờm chờ mờ cih dờp lơh ngan dờng ngan bal mờ ală broă lơh sơrlèt uă ngan bơh Petrovietnam mờ Kông ty dờng Kổ phần Drơng broă Măi mok Nhơm zờu Việt Nam dê tàm broă lam lơh ală rơndăp broă lơh nhơm zờu kwơ màng mờ ală rơndăp broă lơh năng lượng lơh gơlik wơl, tàm hơ̆ mìng is ală rơndăp broă lơh đèng càl tàm dà lềng kờp jơh priă kĭ sră pơrgon lơh pơgăp 2 tơmàn dolar Mỹ. Thủ tướng kơ̆p kờñ Tập đoàn mờ Kông ty dờng bơtàu tơnguh pràn uă rlau tai, mờ khà gơguh uă rlau 2 dơ̆ tàm ală nam tus, lơh geh pơgăp bơh 15 tus 20% pah nam, pơgồp bơnah sơlơ tơnguh tai gơguh GDP jơh gùt lơgar lơh geh gơguh uă rlau, lơh geh pơgăp 8% tàm nam 2025.