Rơndăp broă lơh Gùng che ồs đèng 500kV gơl 3 geh Tập đoàn Ồs đèng Việt Nam jào kông ty dờng Lơh gùng che ồs đèng Dà lơgar lơh tờm bơcri priă, jòng 519 kơi sồ, 1 rơbô 177 tiah lơh ñjrong, 513 ntê ñjrong, lòt gan 211 xã, sơnah ƀòn bơh 43 kơnhoàl gơwèt 09 càr mờ khà priă bơcri rơlao 22 rơbô 300 tơmàn đong.

Đơs tàm pơrjum, Thủ tướng ồng Phạm Minh Chính đơs loh, bơh rơndăp broă lơh do pơgồp bal tàm broă tơnguh uă nùs nhơm pin dờn, bơngă bơh gah lơh ồs đèng tàm lơgar bal mờ ală lơgar dê; ai tơngŏ nùs nhơm pin dờn, kơ̆ dơn bơh gah lơh ồs đèng dê. Thủ tướng đơs nền Đảng neh sồr lơh, Cíñ phủ neh ring bal, Quốk hội dùl nùs bal, Làng bol kờñ bal, den mìng geh bơyai lơh, ờ bơyai lơh wơl. Bè kơnòl tàm nam 2024, Thủ tướng đơs niam Gah ồs đèng lơh gơs jăk chài kơnòl broă geh jào, kơ̆p kờñ ngan Gah lơh ồs đèng là nam 2025 bè cồng nha uă rơlao mờ nam 2024 mờ pơn jăt tai bañ lời ờ tơl ồs đèng.