Tàm dơ̆ wă, Thủ tướng ồng Phạm Minh Chính jờng rơ uă ngan Củ tịc mờ SIA neh geh uă broă lơh, jơnau bơceh lơh kờñ lơgar Việt Nam bơtàu tơnguh lơh sa mờ măi mok ƀán zẫn, tàm tơrbŏ bal mờ uă mpồl lơh sa kă bro tàm mpồl SIA dê jòi tŭ tơngai niam kă bro, lơh broă bal tàm lơgar Việt Nam. Thủ tướng sồr SIA pơn jat tai hòi jà ală Tập đoàn lơgar Mỹ lơh broă bal, bơcri priă lơh jrô ơnàng làm uă rlau tai, geh cồng nha rlau tai tàm gah ƀán zẫn, bồ tơngoh jak kòn bơnus lơh gơlik, điện toán đám mây (anih ơn prăp jơnau yal tơnggĭt tàm internet)... là ală gah kwơ màng ngan mờ rài tơnơ̆ do bơh jơi bơtiàn kòn bơnus dê kung bè bơta bơtàu tơnguh bơh tơl lơgar dê.

Bal mờ hơ̆, Thủ tướng sồr Củ tịc, ală mpồl lơh sa kă bro SIA geh jơnau đơs mờ gơnoar atbồ lơgar Mỹ pơn jat tai sơlơ tơnguh tai bơta gĭt gơ̆p mờ Việt Nam ngai sơlơ jrô ơnàng làm uă, lơh broă ngan ngồn, geh cồng nha rlau tai, gờñ dờp lơgar Việt Nam geh rài lơh sa drà kă bro mờ lời tĕ ală bơta ờ hoan ai gơ rềng tus tăc mờ lơgar ndai măi mok pa mờ lơgar Việt Nam dê.