Ngai 14/5, tàm Hìu lơh broă Đảng Dà lơgar, Mpồl sồr lơh tơn jơh 100 nam Đảng đơng lam kac màng Việt Nam; gùng dà đơng lam bơtàu tơnguh dà lơgar tàm 100 nam pơn jat tai mờ tơn jơh 40 nam lam lơh jat Jơnau pal jat Đảng dê bè bơt bơtàu dà lơgar tàm tŭ tơngai brồ guh tus Củ nghiã sàh hội bơyai lơh dar pơrjum dơ̆ 1. Đơng lam dar pơrjum, Tổng Ƀí thư, Củ tịc lơgar ồng Tô Lâm đơs sùm, tơn jơh 100 nam Đảng đơng lam, 40 nam lơh jat Jơnau pal jat Đảng dê pal geh bơta jrô ơnàng kah yau, bơta kuơ cribơyai mờ bơta pràn tề lam bơt bơtàu tơnơ̆ do in. Tổng Ƀí thư, Củ tịc lơgar đơs loh, nùs nhơm là pal lơh loh rlau tai broă lơh bơtàu tơnguh bơh Việt Nam dê, broă lơh củ nghĩa sàh hội mờ gùng brồ guh tus củ nghĩa sàh hội bơh Việt Nam dê bal mờ ală bơta gơ rềng dờng cèng bơta geh ngan tàm tŭ tơngai bơt bơtàu củ nghĩa sàh hội; bơt bơtàu ală jơnau yal lơh loh lơh bơnàng jă nàng bơt bơtàu Jơnau pal jat Đảng dê bơtàu tơnguh dà lơgar mờ sền gàr dà lơgar tàm rài pa - rài brồ să jơi bơtiàn dê. Tổng Ƀí thư, Củ tịc lơgar ồng Tô Lâm đơs sùm 3 jơnau sồr bè broă lơh tơn jơh, tàm hơ̆ pal pơgồp bal bơnĕ bơnài đah cribơyai mờ ngan ngồn; geh jơnau dan tơnơ̆ do in pal jat tàm cơng tàng jak chài, kờp dŭ lài gùng dà mờ jơnau sồr bơtàu tơnguh dà lơgar.