Tŭ do EVNGENCO1 gam atbồ lơh uă hìu măi pờ tơlik ồs đèng dà kwơ màng tàm càr Lâm Đồng bè Đại Ninh, Đồng Nai 3, Đồng Nai 4, Dà Nhim, Hàm Thuận - Đa Mi mờ ồs đèng măt tơngai pơrđồng tàm tơnao dà Đa Mi, kờp jơh bơta pràn di pơgăp 1 rơbô 615 MW.

Pơn jăt mờ gùng dà bơtàu tơnguh năng lượng lơh geh wơl, EVNGENCO1 dan bơcri priă lơh 3 rơndăp broă lơh ồs đèng măt tơngai pơrđồng tàm càr Lâm Đồng geh: rơndăp broă lơh Hìu măi Ồs đèng măt tơngai pơrđồng tàm tơnao dà Đại Ninh mờ bơta pràn di pơgăp 96MW, kờp jơh priă bơcri kờp dŭ di pơgăp 1 rơbô 600 tơmàn đong; rơndăp broă lơh Hìu măi Ồs đèng măt tơngai pơrđồng Hàm Thuận tơngai sơnrờp mờ bơta pràn di pơgăp 100MW, kờp jơh khà priă bơcri kờp dŭ di pơgăp 1 rơbô 560 tơmàn đong mờ rơndăp broă lơh Hìu măi Ồs đèng măt tơngai pơrđồng tàm tơnao dà Đại Mi tơngai dơ̆ bàr bơta pràn di pơgăp 70MW, kờp jơh priă bơcri lơh di pơgăp 1 rơbô 150 tơmàn đong. Ală rơndăp broă lơh geh kơlôi sơnơng tàm tơngu me ngui tơnao dà bơh ală hìu măi ồs đèng dà tŭ do dê, di pal mờ gùng dà broă bơtàu tơnguh năng lượng lơh geh wơl bơh Cíñ phủ dê bal mờ gùng dà tam gơl năng lượng tơlir.