Tàm ală ngai do, tàm ală bă sre lồi kàl lơh tàm ƀòn A Lao, sàh Mang Yang, càr Gia Lai dê, hìu nhă ồng Ngưm bal mờ uă hìu làng bol, gam jal mhar tơwès kòi kàl prang nàng di tŭ jào ù sre nàng drơng broă lơh Rơndăp broă lơh bơnah broă 3 gơwèt gùng rơndeh lòt mhar Quy Nhơn – Pleiku. Bŭ lah dùl bơnah ù lơh sre gơtìp toh, làng bol tàm ƀòn kung gam ring bal, kờñ bal mờ gùng dà broă lơh tài bơta kwơ bơtàu tơnguh jŏ jòng. Ồng Ngưm pà git, ƀòn A Lao geh 51 hìu gơwèt tàm mpồl tơm ntrờn ù tiah mờ jơh ală hìu neh dờp priă tơm bơtơl, rơcang tă bơsong phan lơh broă, kơl phan tam nàng jào ù ai broă lơh do in: “Làng bol bol añ ưn ngài ngan Dà lơgar neh kờñ lơh broă lơh dờng do. Jơh ală làng bol tàm ƀòn ndrờm kờñ bal mờ rơndăp broă lơh do. Bè bơnah ù bơh hìu nhă añ dê geh tàm bă ù geh lơh broă do là 2 sào sre lơh kòi mờ 1 sào ù tam kơphe; bol añ neh kơl phan tam mờ rơcang jào ù nàng đah lơh gùng do in”.

Mờ gùng dà broă lơh, jào ù tus tàm tiah lơi den mŭt lơh tus tàm tiah hơ̆, tàm rơndăp broă lơh bơnah broă 1 mờ 3, do là tiah geh tơm ntrờn ù tiah neh geh rơlao 70%, ală mpồl lơh broă neh ai git nđờ rơhiang nơm măi mok, phan lơh broă mờ git nđờ rơbô nă cau lơh broă ngai kung bè mang nàng lơh ală bơnah broă lơh bơnàng gùng, brong tơlik dà mờ broă lơh tàm tiah rồm ală rơbàng, trồm gùng dê.

Tàm hơ̆, ală rơbàng dờng bè rơbàng An Nhơn, rơbàng pơrgan dà dờng Kôn, rơbàng Hà Nhe mờ rơbàng pơrgan gùng rơndeh lòt mhar đah Tô – đah Jum geh lơh pràn lài mờ tŭ kàl mìu tus. Ồng Đoàn Minh Hoàng, Cau pơlam jăt sền Kông ty Tă priă bal VNC, mpồl jăt sền lơh rơbàng An Nhơn 4 pà git: “Rơbàng An Nhơn 4, tŭ do là khoàng geh 12 tàm 24 ñjrong bloh, khà broă geh lơh 50% bơh ñjrong do dê. Tŭ do, cau tờm bơcri priă lơh neh jào ù nàng lơh bơnah rơbàng. 2 đah jăt gah rơbàng neh geh lơh. Tŭ do gam bơnah rơbàng, bol añ kơ̆p phan lơh broă nàng lơh bơnah rơbàng”.

Rơndăp broă lơh gùng rơndeh lòt mhar Quy Nhơn – Pleiku jòng di pơgăp 125 kơi sồ, kờp jơh priă bơcri rơlao 43 rơbô 700 tơmàn đong, lòt gan 16 sàh, sơnah ƀòn tàm càr Gia Lai, lơh gơrềng rơlao 4 rơbô 600 hìu làng bol mờ kờp jơh bă ù gơtìp toh rơlao 1 rơbô 97 lồ. Tus ngai 04 nhai 5 nam 2026, khà jào ù tàm Rơndăp broă lơh bơnah broă 1 (22 kơi sồ) geh 70,5%; Rơndăp broă lơh bơnah 3 (25 kơi sồ) geh 72%. Mìng is Rơndăp broă lơh bơnah 3 (68 kơi sồ) gam lơh gơs ală sră nggal nàng rơcang mŭt lơh tàm nhai 5 nam 2026. Bal mờ broă tơm ntrờn ù tiah, geh 10 tàm 12 tiah lơh ƀòn ơm kis pa jăt gah gùng kung neh geh lơh dơ̆ lĕ bal sơl, kờp dŭ geh jào ù ai làng bol in lơh hìu tàm nhai 6 nam 2026.

Ồng Phạm Xuân Tỉnh, Phó Kwang lam bồ Mpồl Đơng lam Rơndăp broă lơh bơnah 1 (gơwèt Mpồl Atbồ ală rơndăp broă lơh gùng lòt mờ broă làng bol ngui càr Gia Lai) pà git, broă lơh ndrờm bal tơm ntrờn ù tiah, mờ lơh jăt broă lơh là broă lơh mhar ngan nàng broă lơh gùng geh lơh gơs di mờ tơngai càr neh ai: “Tus tŭ do, broă tơm ntrờn ù tiah là neh di pal mờ jơnau kờñ lơh bơh cau dờp lơh gùng dê. Bol añ bal mờ cau dờp lơh gùng pơgồp bal mờ ală anih lơh broă gơrềng bal nàng sền wơl broă rơcang phan lơh broă, di pal mờ ală jơnau kờñ bè bơta chài bơh rơndăp broă lơh, nàng bơyai lơh sền gròi geh bơta kơl jăp mờ tơngai lơh”.

Gùng rơndeh lòt mhar Quy Nhơn – Pleiku geh kwơ màng ngan gơwèt mờ càr Gai lai dê, tài rơ̆p lơh gơs gơl gùng tờm tơrbŏ bal kwơ màng đah tiah jăt gah dà lềng đah Jum tàm gùl lơgar mờ tiah bơnơm càr dê, pơgồp bal tàm broă lơh pràn broă tơbŏ bal tiah, tơrmù priă pơn diang phan mờ rề ơnàng broă bơtàu tơnguh. Den tàng, ală tiah bal mờ ală mpồl lơh gùng gam tơrgùm lơh mhar jăt tơngai geh ai nàng gàr niam rơndăp broă lơh geh lơh gơs di jăt tơngai neh geh ai.